АҚШ Эронга қарши урушда нечта самолёт йўқотгани маълум қилинди

АҚШнинг Эронга қарши бир ойдан ортиқ давом этаётган ҳарбий операцияси давомида камида 7 та самолёт йўқ қилинган. Бу ҳақда CNN хабар берди.

 

Маълумотларга кўра, АҚШнинг дастлабки йўқотишлари 2 март куни содир бўлган. Ўшанда учта F-15 қирувчи самолёти Кувайт ҳудуди устида англашилмовчилик туфайли Кувайт ҳаво ҳужумидан мудофаа воситалари томонидан уриб туширилган.

 

Ҳодисада олти нафар экипаж аъзоси катапулт қилиб қутулиб қолган. Пентагон раҳбари Пит Ҳегсетнинг учувчилар кейинчалик яна Эронга қарши ҳаво ҳужумларида иштирок этиш учун хизматга қайтганини билдирган.

 

Орадан бир ярим ҳафта ўтиб, 12 март куни KC-135 ёнилғи қуйиш самолёти ҳалокатга учради. Ҳодиса оқибатида олти нафар экипаж аъзоси ҳалок бўлган.

 

АҚШ ҳарбийларига кўра, мазкур самолёт душман ҳужуми натижасида эмас, балки ҳарбий операция давомида бошқа самолёт билан тўқнашув сабаб қулаган. Иккинчи самолёт эса хавфсиз қўнган.

 

27 март куни ой охирида АҚШ ҲҲКнинг E-3 Sentry ҳаводан огоҳлантириш ва бошқарув самолёти Саудия Арабистонидаги шаҳзода Султон авиабазасида учиш-қўниш йўлагида Эрон ҳужуми натижасида йўқ қилинган.

 

CNN хабарида мазкур авиабазага қилинган ҳужум натижасида камида 10 нафар америкалик ҳарбий жароҳат олгани келтирилган. Ҳодисада яна бир ёнилғи қуйиш самолёти ҳам шикастланган.

 

Бундан ташқари, ўтган ойда АҚШнинг F-35 қирувчи самолёти Яқин Шарқдаги авиабазалардан бирида тахминларга кўра, Эрон қўшинлари томонидан ўққа тутилганидан сўнг фавқулодда қўнишни амалга оширган.

 

Сўнгги йўқотилган икки самолёт F-15 ва А-10 Warthong ҳисобланади. Улардан бири уриб туширилган, иккинчиси эса шикастланган ҳолда Кувайтгача етиб борган.

 

Мазкур ҳодисада икки нафар учувчи қутқарилган, бир нафар учувчи эса бедарак йўқолган.

 

АҚШ ҳаво кучлари полковниги бўлган бедарак йўқолган офицер катапульта пайтида жароҳат олган ва ёрдам келгунча тоғ бағрида яширинган. Шу ердан туриб ўзининг жойлашувини АҚШ базасига узатган. Офицер қутқарилгач, тез тиббий ёрдам кўрсатилган.