АҚШ ва Эрон 45 кунлик сулҳ масаласини муҳокама қилмоқда — Axios

АҚШ, Эрон ва бир қатор минтақавий воситачилар урушни тўхтатишга қаратилган 45 кунлик сулҳ бўйича музокараларни давом эттирмоқда. Бу ҳақда манбаларга таяниб Axios хабар берди.

 

Манбаларга кўра, яқин соатлар ичида келишувга эришиш эҳтимоли паст баҳоланмоқда. Бироқ мазкур музокараларга урушнинг янада кескинлашувининг олдини олиш учун "сўнгги уриниш" сифатида қаралмоқда. 

 

Ушбу вазиятда икки босқичли эҳтимолий ҳужум сценарийси кўриб чиқилмоқда. Яъни, музокаралар муваффақиятсиз якунланса, аввал Эрон ҳудудидаги фуқаролик инфратузилмасига кенг кўламли зарбалар берилиши мумкин. Бунга жавобан эса Эрон томонидан Форс кўрфази давлатларидаги энергия ва сув таъминоти объектларига ҳужум уюштирилиши эҳтимоли мавжуд.

 

Маълум қилинишича, АҚШ президенти Доналд Трамп томонидан Эронга берилган 10 кунлик муҳлат якунланиши арафасида яна узайтирилган. У якшанба куни муддатни қўшимча 20 соатга, сешанба кечгача чўзган. Трамп, шунингдек, АҚШ Эрон билан “чуқур музокаралар” олиб бораётганини билдириб, келишувга ушбу муддат тугамасидан эришиш имконияти мавжудлигини таъкидлаган.

 

Шу билан бирга, у келишувга эришилмаган тақдирда Эрон учун муҳим бўлган инфратузилмаларга зарба бериш эҳтимолини ҳам истисно қилмаган. Манбалар ҳам АҚШ ва Исроил томонидан Эрон энергетика объектларига қарши эҳтимолий кенг кўламли зарбалар режаси тайёр ҳолатда эканини билдирган.

 

Ҳозирда музокаралар Покистон, Миср ва Туркия воситачилигида, шунингдек, АҚШ махсус вакили Стив Уиткофф ҳамда Эрон ташқи ишлар вазири Аббос Ароқчи ўртасидаги мулоқотлар орқали олиб борилмоқда. АҚШ расмийлари сўнгги кунларда Теҳронга бир неча таклифлар тақдим этилганини, аммо ҳозирча улар қабул қилинмаганини эълон қилган.

 

Манбаларнинг қайд этишича, музокараларда икки босқичли келишув муҳокама қилинмоқда. Биринчи босқичда юқорида келтирилган 45 кунлик сулҳ жорий этилиб, бу даврда урушни тўлиқ якунлаш бўйича келишув ишлаб чиқилиши кўзда тутилган. Иккинчи босқич эса урушни расман тугатишни назарда тутади. Зарур ҳолларда сулҳ муддатини узайтириш эҳтимоли ҳам кўриб чиқилмоқда.