Қашқадарё вилояти ҳокими Деҳқонободда “драйвер” лойиҳалар ижроси билан танишди
Ташриф давомида аҳоли учун сайёр қабул ўтказилиб, фуқаролар мурожаатлари кўриб чиқилди.
Муротжон Азимов Қашқадарё вилоятининг Деҳқонобод туманида олиб борилаётган ижтимоий-иқтисодий ислоҳотлар, ҳудудий ривожланиш дастурлари ҳамда «драйвер» лойиҳалар ижроси билан яқиндан танишди.
Ташриф аввалида туман ҳудудидаги мавжуд имкониятлар, истиқболдаги режалар ва устувор йўналишлар юзасидан тайёрланган тақдимот кўриб чиқилди. Унда туманда амалга оширилиши режалаштирилган инфратузилма лойиҳалари, инвестиция ташаббуслари, “Янги Ўзбекистон” массивидаги қурилиш ишлари, шунингдек, эски кўп қаватли уйларни реновация қилиш масалалари муҳокама қилинди.
Шундан сўнг вилоят ҳокими томонидан фуқаролар учун сайёр қабул ташкил этилиб, аҳоли мурожаатлари тингланди. Билдирилган муаммоларни бартараф этиш ҳамда долзарб масалаларни ҳал қилиш бўйича масъулларга тегишли топшириқлар берилди.
Туман марказида ёшлар билан очиқ мулоқот ҳам ўтказилди. Унда ёшларнинг таклиф ва ташаббуслари тингланиб, уларни қўллаб-қувватлаш, бандликни таъминлаш, таълим имкониятларини кенгайтириш ва тадбиркорлик фаолиятини ривожлантириш масалалари муҳокама қилинди.
Ташриф давомида ҳудудда амалга оширилаётган бунёдкорлик ишлари ҳам ўрганилди. Хусусан, М‑39 автомобиль йўли бўйида олиб борилаётган қурилиш ишлари, пиёдалар ва велосипед йўлакларини барпо этиш лойиҳаларининг бориши жойига чиқиб кўздан кечирилди.
Ўрганишлар якунида вилоят ҳокими барча йўналишларда ишларни самарали ташкил этиш, белгиланган муддатларга қатъий риоя қилиш ҳамда ҳудудни комплекс ривожлантириш бўйича масъулларга аниқ вазифалар юклади.
