Қашқадарёда имом-хатиб калтаклангани ҳақидаги хабар рад этилди
Ҳолат юзасидан вилоят Ички ишлар бошқармаси муносабат билдирди.
Ижтимоий тармоқларда Қашқадарё вилоятининг Муборак туманидаги «Хитой» жоме масжидида имом-хатиб бир гуруҳ шахслар томонидан калтаклангани акс этгани айтилган видео тарқалди. Ҳолат юзасидан вилоят ички ишлар органлари расмий муносабат билдирди.
Маълум қилинишича, ўрганишлар жараёнида видеода «имом-хатиб» сифатида кўрсатилган шахс аслида масжидга намоз ўқиш учун келган оддий фуқаро экани аниқланган.
Дастлабки маълумотларга кўра, жорий йилнинг 3 апрель куни соат тахминан 13:40 ларда масжидга келган фуқаро Ж. ва яна икки нафар фуқаро ўртасида ўзаро жанжал юзага келган. Оқибатда фуқаро Ж. енгил тан жароҳати олган.
Ҳозирда мазкур ҳолат юзасидан Муборак туман Ички ишлар бўлими ҳузуридаги тергов бўлинмаси томонидан икки нафар шахсга нисбатан Жиноят кодексининг 277-моддаси (Безорилик) 2-қисми билан жиноят иши қўзғатилган.
Айни пайтда ҳолат бўйича тергов ҳаракатлари давом эттирилмоқда.
