АҚШнинг Эронга қарши операцияси харажатлари 42 миллиард доллардан ошди
Харажатлар кунига ўртача 1 миллиард доллар атрофида бўлган.
АҚШнинг Эронга қарши олиб бораётган ҳарбий операцияси харажатлари 42 миллиард доллардан ошгани маълум қилинди. Бу ҳақда Iran War Cost Tracker портали маълумотларига таяниб хабар берилди.
Қайд этилишича, операция бошланганидан буён бир ойдан ортиқ вақт — тахминан 36 кун ўтган. Порталнинг норасмий ҳисоб-китобларига кўра, шу давр мобайнида АҚШ томонидан сарфланган маблағ 42,5 миллиард долларга етган.
Мазкур платформа харажатларни реал вақт режимида ҳисоблаб боради. Унда ҳарбий хизматчиларни сақлаш, минтақага жойлаштирилган ҳарбий кемалар фаолияти, логистика ва бошқа операцион харажатлар инобатга олинади.
Ҳисоблаш методологияси Пентагоннинг АҚШ Конгрессига тақдим этган ҳисоботларига асосланган. Унга кўра, операциянинг дастлабки олти куни 11,3 миллиард долларга тушган, кейинги даврда эса харажатлар кунига ўртача 1 миллиард доллар атрофида бўлган.
