“Дайди топиб, расмийлаштиринг” — Олмазор тумани ИИБ амалдори
Профилактика инспекторларига кўчадан дайди одам топиб баённома расмийлаштириш бўйича топшириқ берилди.
Тошкент шаҳри Олмазор тумани Ички ишлар бўлими амалдори Аброр Худойбердиев профилактика инспекторларига кўчадан “дайди” топиб, маъмурий баённома расмийлаштириш бўйича топшириқ берган. Бу ҳақда Kun.uz хабар берди.
Нашрга келиб тушган аудио ва видеолавҳаларда амалдор ходимларга дайди топилмаса, ўзлари ёки қариндошлари “дайди” сифатида расмийлаштирилиши кераклигини айтган.
“Э, профилактика инспекторлари, мен сизларга яна қайта айтяпман, дайди ноль бўлиб турибди! Виждонсиз, дайди йўқми Олмазор туманида? Дайди қил ҳозир! Ҳамма нарсада ноль бўлиб ётибди протоколлар: мажбурий даволашга жойлаштиришинг ноль, дайди ноль, маъмурий баённоманг ноль, маъмурий назорат ноль! Нима, ўзларингдан кетиб қолганмисанлар, виждонсиз! Қани биттанг дайди қилма-чи. Ўзингни дайди қилиб олиб бориб ёп, қариндошингни олиб бориб ёп дайди қилиб! Ўзинг дайди бўласан!” — деган амалдор.
Шунингдек, видеолавҳада амалдор белгиланган режани бажариш учун қисқа вақт қолганини айтиб, барча ходимларга кўчаларга чиқиш ҳамда белгиланган миқдорда маъмурий баённомалар тузиш бўйича топшириқ берган.
“1 соат вақтимиз қолди. 22:00 да ҳисоб-китоб бўлади. Мен боришни хоҳламайман. “Давай”, ҳозир “газлаймиз”, 300 тага чиқди, 200 та протоколимиз қолди, чиқ ҳамманг кўчага!” — деган Аброр Худойбердиев ўз топшириғида.
Ички ишлар вазирлиги матбуот хизмати мазкур ҳолат юзасидан нашр сўровига жавобан воқеа ўрганилаётганини билдирган.
