Доғистонда сув омборидаги тупроқли тўсиқ ёрилиб кетди
Тошқин оқибатида 28 та уй сув остида қолган.
Доғистоннинг Дербент туманида жойлашган Гежух сув омборида тупроқли тўсиқ ёрилиши содир бўлди. Бу ҳақда Россия Фавқулодда вазиятлар вазирлигининг минтақавий бошқармаси маълум қилди дейди РБС.
Маълумотларга кўра, кучли ёғингарчилик оқибатида сув омборидаги сув сатҳи кескин кўтарилиб, натижада тупроқли тўсиқ ёрилиб кетган.
Дастлабки маълумотларга кўра, Мамедкала қишлоғида 28 та уй сув остида қолган. Воқеа ортидан қарийб 100 нафар аҳоли эвакуация қилинган. Шунингдек, Михайловка маҳалласи кўчаларини ҳам сув босган. Ҳудудда эвакуация ишлари давом этмоқда ва аҳоли учун олтита вақтинчалик бошпана ташкил этилган.
Фавқулодда вазиятлар вазирлиги ҳодиса жойига қўшимча куч ва техникалар юборилганини маълум қилган. Дербент туманига 40 нафар қутқарувчи ва беш дона махсус техника жалб этилган.
Сув сатҳининг кескин кўтарилиши оқибатида Мамедкала қишлоғи яқинидаги Кавказ федерал магистралининг 917-километрида жойлашган кўприк қулаб тушиб, транспорт ҳаракати вақтинча тўхтатилган.
Шунингдек, маҳаллий расмийлар дарё оқими оқибатида бир аёл ва бир бола ҳалок бўлганини маълум қилган.
