Эрон разведкаси раҳбари ҳалок бўлди
Исроил Мажид Хадемийни тинч аҳолига қарши зарбаларга алоқадорликда айблади.
Эрон Ислом инқилоби қўриқчилари корпуси (ИИҚК) разведка бўлинмаси раҳбари, генерал-майор Мажид Хадемий ҳалок бўлганини тасдиқлади. Бу ҳақда ИИҚК матбуот хизмати хабар берди.
Маълум қилинишича, Эрон 6 апрель куни ИИҚК разведка бўлинмаси раҳбари Мажид Хадемийнинг ҳалок бўлганини расман тасдиқлади. Корпус маълумотига кўра, у эрта тонгда ўлдирилган. Бироқ унинг ўлими билан боғлиқ бошқа тафсилотлар келтирилмаган.
Таъкидланишича, Хадемий 2025 йил июнь ойи ўрталарида, Исролининг Теҳрондаги разведка биносига берган зарбаси оқибатида ўзидан олдин мазкур лавозимда бўлган Муҳаммад Козимийнинг вафотидан сўнг, ИИҚК разведкаси раҳбари этиб тайинланган.
Шунингдек, Исроил мудофаа вазири Исраэл Кац Бош штаб раҳбаридан Хадеймининг Исроил армияси томонидан ўлдирилгани ҳақида маълумот олганини маълум қилди. Катснинг сўзларига кўра, генерал Исроил тинч аҳолисига қарши амалга оширилган ҳалокатли ракета зарбалари учун бевосита жавобгар бўлган.
“ИИҚК инч аҳолига қарата ўқ узмоқда, биз эса террорчилар етакчиларини йўқ қилмоқдамиз”, — деди Кац.
“Эрон раҳбарияти ўзини нишонда тургандек ҳис қилмоқда. Биз уларни бирма-бир йўқ қилиб, овлашни давом эттирамиз”, — дея ваъда берди Исроил мудофаа вазири.
Кац Исроил Эроннинг пўлат ишлаб чиқариш ва нефть-кимё саноатига ҳам “жиддий зарар” етказганини, Эрон миллий инфратузилмасини вайрон қилиш ва режимнинг қудратини сусайтириш бўйича ҳаракатларни давом эттиришини таъкидлади.
Бундан ташқари Исроил расмийси Эрон раҳбариятини бевосита нишонга олишга ва уларни бирма-бир йўқ қилишга ваъда берди.
