Ҳиндистон чегарани қўриқлашда илон ва тимсоҳлардан фойдаланиши мумкин

 

Ҳиндистон Бангладеш билан чегаранинг бориш қийин бўлган ҳудудларида хавфсизликни кучайтириш мақсадида илонлар ва тимсоҳлардан фойдаланиш имкониятини ўрганмоқда. Бу ҳақда The Hindu нашри Ҳиндистон Чегара Хавфсизлиги Кучлари (BSF) ҳужжатларига таяниб хабар берди.

 

Маълум қилинишича, Ҳиндистоннинг Покистон ва Бангладеш билан чегараларини қўриқловчи Чегара Хавфсизлиги Кучлари ўз бўлинмаларига чегара дарёлари ҳудудларида судралиб юрувчилардан фойдаланиш имкониятини таҳлил қилиш бўйича топшириқ берган.

 

Ҳужжатда таъкидланишича, дарёлар бўйидаги заиф ҳудудларда илонлар ёки тимсоҳлар каби судралиб юрувчилардан фойдаланиш операцион нуқтаи назардан қанчалик мақсадга мувофиқлиги ўрганилиши керак.

 

Ушбу ташаббус Ҳиндистон ва Бангладеш ўртасидаги чегара ҳудудларининг дарё, ботқоқлик ва мураккаб рельефга эга қисмларига тааллуқлидир. Бундай жойларда анъанавий тўсиқлар ўрнатиш қийин бўлгани сабабли судралиб юрувчилардан табиий тўсиқ сифатида фойдаланиш варианти кўриб чиқилмоқда.

 

Шу билан бирга, мазкур ташаббус маҳаллий аҳоли учун хавф туғдириши мумкинлиги сабабли ҳозирча фақат ўрганиш босқичида экани қайд этилди.

 

Ҳиндистон Ички ишлар вазирлиги маълумотларига кўра, Ҳиндистон ва Бангладеш ўртасидаги давлат чегараси узунлиги 4900 километрдан ортиқни ташкил этади. Аввалроқ ҳукумат ноқонуний миграция ҳамда ноқонуний фаолиятларнинг олдини олиш мақсадида чегара бўйлаб махсус тўсиқларни босқичма-босқич қуришни бошлаган. Бироқ мураккаб экологик шароитлар сабаб айрим ҳудудларда бу ишлар ҳали якунланмаган.