Маданият вазирлиги санъаткорлар солиққа тортилишида енгилликлар киритишни таклиф қилди

 

Маданият вазирлиги 2026 йил 1 сентябрдан санъаткорлар ва концерт-томоша соҳасидаги ижрочилар хизматларини «Солиқ» мобил иловаси орқали мажбурий рўйхатдан ўтказиш бўйича Адлия вазирлиги томонидан ишлаб чиқилган қарор лойиҳасига муносабат билдирди.

 

Лойиҳа матнида тўй, юбилей, суннат тўйи, никоҳ маросимлари ҳамда ресторан ва бошқа тадбирларда кўрсатиладиган ҳар бир хизмат “бир хизмат — бир тўлов” тамойили асосида солиққа тортилиши назарда тутилган. Бу эса ҳар бир чиқиш алоҳида ҳисобга олиниб, солиқ ундирилишини талаб қилади.

 

Маданият вазирлиги таъкидлашича, ҳозирги кунда концерт-томоша соҳаси вакиллари амалдаги қонунчилик асосида солиқ тўлаб келмоқда. Улар ҳар ой камида бир баравар базавий ҳисоблаш миқдорида (ҳозирда 412 минг сўм) ижтимоий солиқ тўлайди ва йиллик даромадидан 12 фоиз даромад солиғи ундирилади. Шунингдек, давлат тадбирларига жалб этиладиган ижодкорлар ва ижрочиларнинг хизмат ҳақлари қонуний тартибда тўланади.

 

Вазирлик лойиҳа юзасидан солиқ ставкаларини тоифалар кесимида адолатли белгилаш, санъаткорлар ва ижрочилар учун табақалаштирилган ёндашувни жорий этиш, ҳужжат нормаларини аниқлаштириш ва амалий қўллашни соддалаштириш, давлат тадбирларига жалб этиладиган ижодкорларнинг ҳуқуқларини ҳимоя қилиш каби таклифларни билдирди.

 

Вазирлик шунингдек жамоатчилик фикри муҳимлигини таъкидлаб, якуний қарор қонунийлик, адолат ва амалий самарадорлик тамойиллари асосида қабул қилиниши лозимлигини маълум қилди.