Саида Мирзиёева Сержио Гор билан учрашди
Учрашув Доналд Трампнинг Флоридадаги қароргоҳида бўлиб ўтди.
Ўзбекистон Президенти администрацияси раҳбари Саида Мирзиёева 6 апрель куни Мар-а-Лаго қароргоҳида учрашув ўтказди.
Учрашув давомида АҚШ президентининг Жанубий ва Марказий Осиё бўйича махсус вакили, элчи Сержио Гор билан музокаралар олиб борилди. Тадбирда, шунингдек, АҚШ Президенти Доналд Трампнинг қизи Тиффани Трамп ҳамда унинг турмуш ўртоғи Майкл Булос ҳам иштирок этди.
Саида Мирзиёева учрашув якунлари юзасидан илиқ қабул ва меҳмондўстлик учун миннатдорлик билдириб, мулоқотни мазмунли ва конструктив деб баҳолади.
“Самимий меҳмондўстлик ва илиқ қабул учун чин дилдан миннатдорлик билдираман. Бўлиб ўтган мазмунли ва конструктив мулоқотни юксак қадрлайман ҳамда яқин кунларда Вашингтонда самарали учрашувлар ўтказилишига умид қиламан”, — деди у.
Саида Мирзиёева ва Сержио Гор Америка–Ўзбекистон ишбилармонлик ва инвестиция кенгашининг ҳамраислари ҳисобланади.
