Ўзбекистонда аскарларга имтиёзли кредит ва масофавий таълим имконияти берилади

 

Ўзбекистон Республикаси Президенти, Қуролли Кучлар Олий Бош Қўмондони Шавкат Мирзиёев 6 апрель куни мамлакат мудофаа қобилиятини мустаҳкамлаш ва ҳарбий хизматчиларни қўллаб-қувватлаш масалалари юзасидан йиғилиш ўтказди.

 

Йиғилишда муддатли ҳарбий хизматга чақирилган ёшларга касб-ҳунар эгаллаш, олий таълим олиш ва китобхонликни оммалаштириш юзасидан ишлаб чиқилган таклифлар кўриб чиқилди.

 

Жумладан, 2026-2027 ўқув йилидан бошлаб муддатли ҳарбий хизматга чақирилган ёшларга бир қатор қуйидаги имтиёз ҳамда кафолатлар берилиши назарда тутилмоқда:

 

• Ҳарбий хизмат давомида олийгоҳларга масофавий таълим олиш имконияти яратилади.
• Аскарларга тайёрлаш курслари ташкил қилинади ва имтиҳонларга тайёрлаш тизими йўлга қўйилади.
• Шартнома асосида ўқийдиганларга фоизсиз имтиёзли кредитлар берилади. Ҳарбий факультет талабаларига тенглаштириш орқали ўқишни тугатгандан сўнг захирадаги лейтенант унвони тақдим этилади.
• Спорт мусобақалари ва фан олимпиадаларида ғолиб бўлган аскарлар тест синовларисиз қабул қилинади.
• “Битта аскар – битта касб” тамойили асосида 3–6 ойлик касб-ҳунар курслари ташкил этилади, махсус сертификатлар берилади.
• Муддатли ҳарбий хизматдан қайтган ёшларнинг касб-ҳунар харажатлари ваучер орқали қоплаб берилади.
• Давлат ташкилотларига ишга кириш истагида бўлганларга тестларда 10 фоизлик имтиёз баллари берилади.
• Ҳарбий хизматчилар ўртасида “Маънавият қалқони” китобхонлик танлови жорий этилади, якуний босқич ғолиблари электромобил ва диплом билан тақдирланади.

 

Давлат раҳбари ушбу чора-тадбирларни маъқуллаб, тегишли қарорларни имзолади. Янги чора-тадбирлар мамлакат тараққиёти ва юқори билимли, ватанпарвар кадрлар захирасини шакллантиришга хизмат қилиши таъкидланди.