Ўзбекистонда март ойида инфляция 0,6 фоизни ташкил этди

Ўзбекистонда 2026 йил март ойида истеъмол нархлари ўртача 0,6 фоизга ошди. Бу ҳақда Миллий статистика қўмитаси маълум қилди.

 

Маълумотларга кўра, йиллик истеъмол нархлари индекси (ИНИ) 107,1 фоизни ташкил этган. Бу кўрсаткич ўтган йилнинг шу даврига нисбатан 3,2 фоиз бандга паст (2025 йил март ойида — 110,3 фоиз).

 

Ҳисоботда қайд этилишича, март ойида озиқ-овқат маҳсулотлари нархлари ўртача 1,2 фоизга ошган. Шунингдек, ноозиқ-овқат товарлари 0,3 фоизга, аҳолига кўрсатиладиган пуллик хизматлар эса 0,2 фоизга қимматлашган.

 

Озиқ-овқат маҳсулотлари орасида помидор (11,5 фоиз), булғор қалампири (10,0 фоиз), картошка (9,8 фоиз), қовоқ (9,4 фоиз), олма (7,4 фоиз), банан (6,0 фоиз) ва лимон (4,4 фоиз) нархларининг ўсиши инфляцияга асосий таъсир кўрсатган. 

 

Шунингдек, товуқ тухуми (2,1 фоиз), мол гўшти (1,8 фоиз), балиқ (1,7 фоиз), шакар (1,7 фоиз), қўй гўшти (1,2 фоиз), кунгабоқар ёғи (1,0 фоиз), умумий овқатланиш шохобчаларидаги тайёр таомлар (0,8 фоиз) ва биринчи навли буғдой уни (0,6 фоиз) нархлари ҳам ошган.

 

Айни пайтда, бодринг нархи 20,7 фоизга, карам 4,7 фоизга ва пиёз 4,6 фоизга арзонлашиб, инфляция даражасини пасайтирувчи омил сифатида қайд этилган.

 

Ноозиқ-овқат товарлари сегментида томир кенгайтирувчи препаратлар (0,9 фоиз), аёллар кўйлаклари (0,8 фоиз) ва цемент (0,8 фоиз) нархлари ошган. Шу билан бирга, пропан 3,2 фоизга, АИ-92 бензини эса 0,9 фоизга арзонлаган.

 

Хизматлар соҳасида маиший чиқиндилар учун тўлов ва бўяш ишлари хизматлари нархлари 0,9 фоизга ошган бўлса, ички ва халқаро йўловчи ҳаво транспорти тарифлари 4,1 фоизга пасайган.

 

Қайд этилишича, ҳисоб-китоблар 10 мингдан ортиқ савдо ва хизмат кўрсатиш нуқталарида қайд этилган қарийб 1,2 миллионта нархлар асосида амалга оширилган. Таҳлил доирасида 419 турдаги товарлар ва 98 турдаги хизматлар қамраб олинган.