Ўзбекистонда ун ишлаб чиқарувчи 29 та корхона биржа савдоларидан четлаштирилди

Рақобат қўмитаси томонидан ички бозорда буғдой маҳсулотлари нархларини барқарорлаштириш юзасидан ўтказилган мониторинглар натижасида қонунчилик талабларини бузган бир қатор хўжалик юритувчи субъектлар биржа савдоларидан четлаштирилди.

 

Қўмита маълумотига кўра, амалдаги тартибга мувофиқ буғдой ва ун маҳсулотлари юқори ликвидли ҳамда ижтимоий аҳамиятга эга товарлар қаторига киритилган бўлиб, уларни сотиш фақат биржа савдолари орқали амалга оширилиши белгиланган. Давлат ресурси ҳисобидан харид қилинган буғдойдан ишлаб чиқарилган ун маҳсулотларини белгиланган ҳажмларда биржа орқали сотиш мажбурий ҳисобланади.

 

Дастлабки мониторинглар давомида айрим корхоналар томонидан ички бозор учун ишлаб чиқарилган ун маҳсулотларини биржа савдоларига чиқармаслик ҳолатлари аниқланган. 

 

Шу муносабат билан, 2026 йил 3 апрелдан бошлаб давлат ресурси буғдойидан ишлаб чиқарилган унни биржага қайта жойлаштирмаган ёки талаб даражасида сотувга чиқармаган 29 та корхонага нисбатан чора кўрилган.

 

Шунингдек, жорий йилнинг биринчи чораги якунлари бўйича давлат ресурсидан харид қилинган буғдойдан ишлаб чиқарилган унни биржа орқали сотиш тартибига риоя этмаган 25 та корхонага нисбатан иш қўзғатилиб, тегишли таъсир чораларини қўллаш бўйича қарорлар қабул қилинган.

 

Рақобат қўмитаси ички бозорда нархлар барқарорлигини таъминлаш мақсадида давлат ресурси буғдойини харид қилган корхоналар учун ун маҳсулотларини белгиланган ҳажмларда биржа савдоларига чиқариш мажбурий эканини эслатди. 

 

Қонунчилик талаблари бузилган тақдирда эса қатъий чоралар кўрилиши маълум қилинди.