Барча давлат идораларида ҳафтада бир кун спорт куни бўлади

 

Шавкат Мирзиёев раислигида жисмоний тарбия ва спорт соҳасидаги устувор вазифаларга бағишланган видеоселектор йиғилиши ўтказилди.

 

Йиғилишда давлат бошқаруви органлари раҳбарлари спортни оммалаштиришда шахсий намуна кўрсатиши зарурлиги таъкидланди. Хусусан, ҳар бир вазир, тармоқ ва банк раҳбари, вилоят ҳамда туман ҳокимлари ходимларнинг спорт билан мунтазам шуғулланиши учун шароит яратиши лозимлиги қайд этилди.

 

Шу мақсадда ҳафтада бир кун спорт куни сифатида белгиланиши ва бу кунда вазирлик, идора ҳамда ташкилотларда спорт машғулотлари ўтказилиши белгиланди. Агар муассасаларда спорт заллари мавжуд бўлмаса, спорт базалари ёки федерациялар билан шартномалар тузиш орқали машғулотларни ташкил этиш топширилди.

 

Бундан ташқари, камида тўртта спорт тури бўйича йилига икки маротаба мусобақалар ташкил этиш ҳамда ғолибларни муносиб рағбатлантириш вазифаси қўйилди.

 

Жорий йилдан бошлаб вазирликлар, тармоқлар, банклар ва ҳокимликлар ўртасида ҳар йили республика биринчиликларини ўтказиш ҳам режалаштирилмоқда.

 

Йиғилишда хусусий секторда ҳам оммавий спортни ривожлантириш бўйича қўшимча имкониятлар яратилиши қайд этилди. Жумладан, тадбиркорлар ўз ишчи-ходимлари учун спорт зали ёки спорт майдончаси қуриш ҳамда уларни жиҳозлаш учун сарфлаган харажатларини фойда солиғи базасидан чегириш имкониятига эга бўлади.

 

Шунингдек, бундай спорт инфратузилмасида фаолият юритадиган тренерлар учун даромад солиғи ва ижтимоий солиқ ставкаси 1 фоиз этиб белгиланади.