Эрон АҚШга урушни тугатиш бўйича 10 банддан иборат режани тақдим этди
Эрон ҳужумлар тўхтатилса ва санкциялар бекор қилинса, Ҳўрмуз бўғозини очишини билдирган.
Эрон АҚШ ва Исроил билан давом этаётган можаро фонида урушни тўлиқ якунлаш бўйича 10 банддан иборат режани тақдим қилди. Бу ҳақда The New York Times хабар берди.
Маълум қилинишича, мазкур таклиф Покистон воситачилигида АҚШ томонига етказилган. Ҳужжатда Эронга қарши ҳар қандай ҳужумларни тўлиқ тўхтатиш ва келгусида қайта зарба берилмаслиги бўйича кафолат бериш, Ливанда “Ҳизбуллоҳ”га қарши Исроил амалиётларини тўхтатиш ҳамда барча иқтисодий санкцияларни бекор қилиш талаблари илгари сурилган. Бунинг эвазига Эрон Ҳўрмуз бўғози орқали ўтувчи муҳим денгиз йўлига қўйган амалдаги блокадасини бекор қилади.
Шунингдек, ҳар бир кема учун тахминан 2 миллион доллар миқдорида тўлов жорий этилиши ва бу маблағ Уммон билан тақсимланиши режалаштирилган. Эрон ушбу даромадни АҚШ ва Исроил зарбалари натижасида вайрон бўлган инфратузилмани тиклашга йўналтиради ва АҚШдан компенсация талаб қилмайди.
АҚШ президенти Доналд Трамп ушбу таклифни “муҳим қадам” деб баҳолаган, бироқ уни етарли эмаслигини таъкидлаган.
Аввалроқ Трамп Эрон Ҳормуз бўғозини очмаса, мамлакатдаги муҳим инфратузилма объектларига зарба берилиши мумкинлигини билдирган эди. У белгиланган муддатгача талаблар бажарилмаса, кенг кўламли ҳаво ҳужумлари амалга оширилишини ҳам маълум қилган.
Эрон давлат ОАВлари эса таклиф ўт очишни вақтинчалик тўхтатишни эмас, балки урушни тўлиқ якунлашни назарда тутишини билдирган.
Шунингдек, хабарда расмий Теҳрон ўз позициясида қатъий тураётгани, хусусан Ҳўрмуз бўғозида юк ташиш жараёнларига жиддий таъсир кўрсата олгани қайд этилган.
Эслатиб ўтамиз, аввалроқ АҚШ ҳам Эрон томонига 15 банддан иборат таклиф юборган, бироқ Теҳрон уни рад этган ва ўз таклифларини илгари сурган.
