Исроил Ғазодаги мактаб яқинига зарба берди
Ҳужум оқибатида 10 киши ҳалок бўлди.
Душанба куни Ғазо секторида кўчирилган фаластинликлар жойлашган мактаб яқинида амалга оширилган Исроил ҳаво зарбаси оқибатида камида 10 киши ҳалок бўлди, яна бир нечта одам яраланди. Бу ҳақда Reuters хабар бермоқда.
Тиббиёт ходимларининг маълум қилишича, ҳужум марказий Ғазодаги Мағозий қочқинлар лагери шарқида, аҳоли зич жойлашган ҳудудда содир этилган.
Шифокорлар ва маҳаллий аҳоли вакилларининг айтишича, ҳужумдан олдин фаластинликлар ва Исроил қўллаб-қувватлаётган милиция аъзолари ўртасида тўқнашув юзага келган. Улар мазкур гуруҳ мактабга ҳужум қилиб, айрим одамларни ўғирлаб кетмоқчи бўлганини билдирган.
Тўқнашувлар давомида Исроил ҳудудга иккита ракета учирган. Гувоҳнинг сўзларига кўра, милиция аъзолари ҳудудга кириб келганидан сўнг ўқ узишни бошлаган, аҳоли эса ўзларини ҳимоя қилишга уринган.
Кейинроқ, Исроил қўллаб-қувватлаётган милиция раҳбарларидан бири видеомурожаатда (унинг ҳақиқийлиги ҳозирча тасдиқланмаган) беш нафар ҲАМАС аъзоси ўлдирилганини маълум қилди. ҲАМАС бу баёнотга изоҳ бермаган.
Аввалроқ шу куни Ғазо шаҳрида мототранспортда кетаётган бир фаластинлик Исроил зарбаси натижасида ҳалок бўлиб, бир бола яраланган. Шунингдек, марказий Ғазода автомобилга ўқ узилиши натижасида яна бир киши ҳалок бўлган. Шу тариқа кун давомида қурбонлар сони камида 12 нафарга етган.
