Шавкат Мирзиёев топшириғи ижроси доирасида ички ишлар ходимлари учун махсус ўқув курслари бошланди
Машғулотларга давлат органлари, суд-ҳуқуқ тизими вакиллари, экспертлар ҳамда малакали профессор-ўқитувчилар жалб этилган.
Президент Шавкат Мирзиёев раислигида ўтказилган видеоселектор йиғилишида берилган топшириқлар ижроси доирасида Давлат сиёсати ва бошқаруви академиясида ички ишлар органлари ходимлари учун махсус ўқув курслари бошланди.
Маълум қилинишича, уч кунлик машғулотлар ходимларнинг аҳоли билан самарали мулоқот қилиш, мурожаатларни тизимли ҳал этиш, шунингдек касбий ва психологик тайёргарлигини оширишга қаратилган.
Дастур доирасида тингловчилар фуқаролар билан ишлашнинг замонавий ёндашувлари, ҳуқуқбузарликларнинг олдини олиш, тергов жараёнларида қонунийликни таъминлаш ҳамда коррупцияга қарши курашиш механизмларини ўрганмоқда.
Машғулотларга давлат органлари, суд-ҳуқуқ тизими вакиллари, экспертлар ҳамда малакали профессор-ўқитувчилар жалб этилган. Таълим жараёни амалий кейслар ва симуляцион вазиятлар асосида ташкил этилгани қайд этилмоқда.
Президент Шавкат Мирзиёев раислигида 2026 йил 13 март куни аҳоли мурожаатлари билан ишлаш тизимини такомиллаштириш, Халқ қабулхоналари фаолиятини янги босқичга олиб чиқиш ва жамоатчилик фикрини чуқур таҳлил қилиш масалалари юзасидан видеоселектор йиғилиши бўлиб ўтган эди.
Мазкур йиғилишида Президент Виртуал ва Халқ қабулхоналарига ички ишлар органлари фаолиятига оид мурожаатлар ҳалигача кўплаб тушаётгани, айрим ҳолларда ходимлар муомаласи ва хизмат фаолияти юзасидан салбий фикрлар билдирилаётгани танқидий муҳокама қилинган эди.
