Тошкент вилоятидаги боғчада болани ҳақорат қилиб урган тарбиячи ишдан бўшатилди
Тарбиячи боланинг ухламаганидан норози бўлиб, уни “урод” деб ҳақорат қилган ва урган.
Тошкент вилоятининг Оҳангарон шаҳридаги мактабгача таълим муассасаларидан бирида тарбиячи томонидан кичик ёшли болага нисбатан жисмоний куч ишлатилгани ва у ҳақорат қилингани маълум бўлди. Мазкур ҳолат юзасидан тарбиячи билан тузилган меҳнат шартномаси бекор қилиниб, у ишдан бўшатилган.
Kun.uzнинг маълум қилишича, воқеа Оҳангарон шаҳридаги 10-сонли давлат мактабгача таълим муассасасида содир бўлган.
Тарбиячи боланинг ухламаганидан норози бўлиб, уни “урод” деб ҳақорат қилган ҳамда унга нисбатан жисмоний куч ишлатган. У ушбу жараённи тасвирга олиб, танишига юборган.
Билдирилишича, тарбиячи Ш.А. болага нисбатан жисмоний куч ишлатгани ҳамда тарбияланувчининг шаъни ва қадр-қимматини таҳқирловчи муносабатда бўлгани сабабли 2026 йил 6 апрел куни у билан тузилган меҳнат шартномаси бекор қилиниб, ишдан бўшатилган.
Болалар омбудсмани ушбу ҳаракатлар болага нисбатан зўравонлик ва унинг шаъни ҳамда қадр-қимматини камситиш сифатида баҳоланишини таъкидлади.
Ҳозирда мазкур ҳолат юзасидан Оҳангарон шаҳар ички ишлар органлари томонидан терговга қадар текширув ишлари олиб борилмоқда.
Қайд этилишича, бола манфаатларини ҳимоя қилиш мақсадида ушбу иш Болалар омбудсмани назоратига олинган. Ҳолат бўйича қўшимча маълумотлар кейинчалик тақдим этилиши кутилмоқда.
