Тошкентда иккитa автобусда ёнғин юзага келди

Тошкент шаҳрида 6 апрель куни “Мерcедес-Бенз” русумли иккита йўловчи автобусида ёнғин ва тутун чиқиши ҳолатлари қайд этилди. Ҳолатлар юзасидан “Тошшаҳартрансхизмат” АЖ расмий маълумот берди.

 

Маълум қилинишича, биринчи ҳодиса соат 18:45 атрофида Сергели тумани, Янги Сергели кўчасида содир бўлган. 2012 йилда ишлаб чиқарилган, “4-автобус саройи” тасарруфидаги, давлат рақами 01/916 ОЖА бўлган 143-сонли йўналиш автобусида электр кабелларининг қисқа туташуви натижасида ёнғин юзага келган. Ҳайдовчи Ф.А. дастлабки ўт ўчириш воситаси билан ёнғинни бартараф этишга уринган, бироқ аланга кучайган. Шундан сўнг воқеа жойига ФВВ ёнғин-қутқарув бўлинмалари етиб келиб, ёнғинни қисқа вақт ичида ўчиришга муваффақ бўлган. Ҳодиса оқибатида жабрланганлар йўқ, автобусга техник зарар етган.

 

Иккинчи ҳолат эса шу куни соат 21:55 да Қибрай туманидаги “Қашқарлик” бекатида кузатилган. “8-автобус саройи” филиалига қарашли, давлат рақами 01|988 TCA бўлган, 169-сонли йўналишда ҳаракатланган 2012 йилда ишлаб чиқарилган автобусда мотор қисмидаги электр симларининг қисқа туташуви сабаб тутун чиқиши аниқланган. Ҳайдовчи А.У. вазиятни тезкор баҳолаб, зарур чораларни кўрган ва туташ ҳолатини бартараф этган. Ушбу ҳодисада ҳам жабрланганлар йўқ, автобус техник шикастланган.

 

Ҳозирда ҳар иккала ҳолат юзасидан мутахассислар томонидан хизмат текширувлари олиб борилмоқда ҳамда техник носозликларни бартараф этиш ишлари давом этмоқда. 

 

Автобуслар тўлиқ соз ҳолатга келтирилгач, белгиланган тартибда яна йўналишларга чиқарилиши режалаштирилган.