Тошкентдаги “Бешқўрғон” бозорида ёнғин хавфсизлиги қоидалари бузилгани аниқланди
Бозорнинг иш фаолияти вақтинча тўхтатилди.
“Бешқўрғон” бозоридаги автоматик ёнғин ўчириш тизими носоз ҳолатда эканлиги аниқланди. Бу ҳақда ФВВ хабар берди.
Маълум қилинишича, 5 апрель куни Чилонзор туманида жойлашган “Бешқўрғон” бозорида ёнғин содир бўлганидан сўнг, бозор ҳудуди атрофидаги ёқилғи қуйиш шохобчаси ва савдо комплекси тегишли тартибда Тошкент шаҳар ФВББ томонидан текширилди.
Текширув давомида автомобилларга ёнилғи қуйиш шохобчасидаги ёнилғи сақлаш сиғимига яқин масофада жойлашган бинодан омборхона сифатида фойдаланилаётгани, савдо комплекси биносидаги мавжуд автоматик ёнғин ўчириш тизими носоз ҳолатда эканлиги ва шунга ўхшаш бир нечта ёнғин хавфсизлиги қоидаларининг қўпол равишда бузилгани маълум бўлган.
Барча камчиликлар тўлиқ бартараф этилгунга қадар бозорнинг иш фаолияти вақтинча тўхтатилди.
Эслатиб ўтамиз, 5 апрель соат 15:56 да Тошкент шаҳар Чилонзор тумани, Тошкент катта халқа автомобиль йўли кўчасида жойлашган "Бешқўрғон" бозорида ёнғин содир бўлганди.
ФВВ мажмуанинг 3000 кв.м майдони ва моддий бойликлари, шунингдек, унга туташ бўлган ҳудуддаги автомобилларга ёқилғи қуйиш шохобчаси ҳамда 5 қаватли автотураргоҳ ёнғиндан сақлаб қолинганини маълум қилганди.
