Венесуэла президентлигига номзод бўлишим мумкин — Трамп

АҚШ президенти Доналд Трамп Венесуэла президентлигига номзодини қўйиши мумкинлигини билдириб, бунинг учун испан тилини “тезда ўрганишини” айтди. Бу ҳақда Fox News хабар берди.

 

Ушбу баёнот душанба куни Эрон ҳудудида уриб туширилган қирувчи самолётдан сўнг бедарак йўқолган АҚШ Ҳарбий-ҳаво кучлари офицерини қутқариш операциясига бағишланган матбуот анжуманида янгради.

 

Трампнинг сўзларига кўра, агар у Венесуэлада сайловда қатнашса, мамлакатда энг юқори рейтингга эга бўлиши мумкин. 

 

Президент матбуот анжумани давомида Венесуэла ҳақида бир неча бор тўхталиб, АҚШнинг ушбу давлатдаги ҳаракатларини тилга олди. У Пасха дам олиш кунларидаги қутқарув операциясини Венесуэла президенти Николас Мадуро қўлга олингани билан солиштирди ҳамда Венесуэла билан боғлиқ можаро “45 дақиқада якунланганини” таъкидлади. Шунингдек, АҚШ ушбу мамлакатдан юзлаб миллион баррель нефть олганини қайд этди.

 

Аввалроқ, ҳукумат йиғилишларидан бирида ҳам Трамп Венесуэлада президентлик сайловида қатнашиши мумкинлигини айтиб, бу ғояни “ажойиб вариант” деб атаган эди. У вақтинчалик президент Делси Родригезга қарши сайловда иштирок этишини ҳам истисно қилмаган.

 

Шу билан бирга, Трамп ўзининг тил ўрганиш қобилиятини юқори баҳолаганига қарамай, ўтган ой Лотин Америкаси етакчилари билан ўтган саммитда янги тил ўрганишга вақт ажратмаслигини билдирган эди. У ўша чиқишида АҚШ давлат котиби Марко Рубионинг испан тилини мукаммал билишини алоҳида таъкидлаган.