Ўзбекистонда ҳарбий хизматчиларнинг пенсия миқдори оширилиши мумкин
Мазкур имтиёз 30 йилдан ортиқ хизмат қилган ҳарбийлар учун қўлланилади.
Ўзбекистонда ҳарбий хизматчилар ва уларнинг оила аъзоларини пенсия билан таъминлаш тизимини такомиллаштиришга қаратилган қонун лойиҳаси биринчи ўқишда кўриб чиқилди.
Қонун лойиҳасига кўра, ҳарбий хизматчилар (ходимлар) ва уларнинг оила аъзоларини давлат пенсиялари билан таъминлашнинг ҳуқуқий асосларини қонун даражасида белгилаш, шунингдек, пенсия тайинлаш шартлари, турлари, миқдорлари ҳамда тартибига оид нормаларни янада такомиллаштириш назарда тутилмоқда.
Хусусан, ҳарбий хизматда 30 йилдан ортиқ хизмат қилганлар учун пенсиянинг базавий миқдорини аниқлашда иш ҳақининг ҳисобга олинадиган миқдорини 75 фоиздан 100 фоизга ошириш таклиф этилмоқда.
Бундан ташқари, пенсия тайинлашда асос бўладиган пенсияни ҳисоблаш базавий миқдорини 10 бараваридан келиб чиқиб ҳисоблаш амалиётини 12 бараваридан келиб чиқиб амалга ошириш таклиф этилмоқда.
Қонун лойиҳасида тақдим этилаётган ушбу имтиёзлар узоқ йиллар давомида мамлакат хавфсизлигини таъминлаш йўлида хизмат қилган ҳарбий хизматчиларни қўшимча рағбатлантиришга қаратилгани қайд этилди.
Мажлисда қонун лойиҳаси депутатлар томонидан биринчи ўқишда қабул қилинди.
