Ўзбекистонда чет тиллари ўқув марказларини очиш бўйича имтиёзлар кенгайтирилади

Ўзбекистонда чет тилларига ихтисослашган ўқув марказларини ташкил этиш бўйича имтиёзли шартлар доираси кенгайтирилади. Бу ҳақда "Ҳуқуқий ахборот" Теlegram-канали хабар берди.

 

Ҳужжатга кўра, янги ишланмаларга асосланган “спин-офф” корхоналар реестри жорий этилади. Реестрга киритилган, патентланган илмий тадқиқотлар натижасида яратилган ишланмалар асосида маҳсулот ишлаб чиқаришни йўлга қўйган корхоналар ҳамда уларнинг ходимларига 2017 йил 30 июндаги ПФ–5099-сон фармонда назарда тутилган имтиёз ва преференциялар татбиқ этилади.

 

Шунингдек, патент олинмаган илмий ишланмалар асосида фаолият юритаётган корхоналар 2026 йил 1 майдан 2029 йил 1 майгача фойда солиғини амалдаги ставкадан 50 фоиз камайтирилган ҳолда тўлайди.

 

Фармонга мувофиқ, 2026 йил 1 майдан бошлаб олимлар ва тадбиркорлар томонидан давлат илмий дастурлари доирасида амалга оширилган фундаментал, амалий ва инновацион лойиҳалар натижасида яратилган ишланмалар бўйича тажриба-синов ишлари харажатларининг бир қисми Илм-фанни молиялаштириш ва инновацияларни қўллаб-қувватлаш жамғармаси ҳисобидан қопланади.

 

Бундан ташқари, хорижий тил бўйича камида C1 даражадаги миллий ёки халқаро сертификатга эга ёшларга олис ва бориш қийин ҳудудларда ўқув марказлари очиш учун бериладиган имтиёзли шартлар кенгайтирилмоқда. 

 

Эндиликда бундай фоизсиз ссудалар 30 ёшдан ошган шахсларга ҳам тақдим этилади. Мазкур кредитлар 6 ойлик имтиёзли давр билан 3 йил муддатга, базавий ҳисоблаш миқдорининг 320 бараваригача ажратилади.