Ўзбекистонда экологик ҳуқуқбузарликлар учун жавобгарлик кучайтирилади

Олий Мажлис Сенати атроф-муҳитни муҳофаза қилиш ва табиатдан фойдаланиш соҳасидаги ҳуқуқбузарликлар учун жавобгарликни кучайтиришга қаратилган қонунни маъқуллади. Бу ҳақда парламент юқори палатаси матбуот хизмати маълум қилди.

 

Қонун билан экологика ва атроф-муҳитни муҳофаза қилиш соҳасида содир этиладиган қоидабузарликларнинг олдини олиш ҳамда жавобгарлик чораларини кучайтиришга қаратилган бир қатор ўзгартириш ва қўшимчалар киритилмоқда.

 

Ялпи мажлисда таъкидланишича, амалдаги тартибга кўра Маъмурий жавобгарлик тўғрисидаги кодексида назарда тутилган айрим экологик ҳуқуқбузарликлар учун жарималар миқдори паст бўлиб, улар етарли даражада огоҳлантирувчи ва профилактик таъсир кўрсатмайди.

 

Шунингдек, мансабдор шахсларга нисбатан қўлланилаётган жарималар баъзи ҳолларда тадбиркорлик субъектларига сезиларли молиявий таъсир кўрсатмайди, бу эса мулкдорлар орасида “жазосизлик ҳисси” пайдо бўлишига олиб келмоқда. Шу сабабли экологика, атроф-муҳитни муҳофаза қилиш ва табиий ресурслардан фойдаланиш соҳасидаги қоидабузарликлар учун жазоларни кучайтириш зарурлиги таъкидланди.

 

Қонунига мувофиқ, Атроф‑муҳитни муҳофаза қилиш тўғрисидаги қонунга юридик шахсларга нисбатан молиявий санкцияларни белгилайдиган янги боб киритилмоқда. Мазкур нормалар экологик талабларни бузган ташкилотларга нисбатан қатъий чоралар кўришга хизмат қилади.

 

Бундан ташқари, кодекснинг 88-моддасига ҳам ўзгартиришлар киритилмоқда. Унга кўра, атмосфера ҳавосини муҳофаза қилиш талабларини бузган ҳолда шиналар, битум, ёқилғи мойи, плёнка, синтетик материаллар, резина, жун толаси ҳамда турли чиқиндиларни махсус мўлжалланмаган жойларда ёқиш учун маъмурий жавобгарлик белгиланиши назарда тутилмоқда.

 

Қайд этилишича, янги тартиб экологик ҳуқуқбузарликларнинг олдини олиш, атроф-муҳитни муҳофаза қилиш тизимини мустаҳкамлаш ҳамда табиатдан оқилона фойдаланишни таъминлашга хизмат қилади.