Ўзбекистонда юқори натижа кўрсатган спорт мактаблари 500 миллион сўм билан мукофотланади

Шавкат Мирзиёев раислигида жисмоний тарбия ва спорт соҳасидаги устувор вазифаларга бағишланган видеоселектор йиғилишида ихтисослашган спорт мактаблари фаолияти таҳлил қилиниб, айрим ҳудудларда уларнинг натижалари оддий спорт мактабларидан деярли фарқ қилмаётгани танқид қилинди.

 

Мисол сифатида, Термиз шаҳридаги тўртта ихтисослашган спорт мактабининг натижалари Жарқўрғон туманидаги битта спорт мактаби даражасига ҳам етмаётгани қайд этилди. Хусусан, Жарқўрғон спорт мактаби ўтган йили Осиё ва жаҳон чемпионатларида 6 та совринни қўлга киритган бўлса, вилоятдаги тўртта ихтисослашган мактаб ҳисобида атиги битта медал мавжуд.

 

Йиғилишда ҳар бир ихтисослашган спорт мактаби директори, мураббийлари ва жамоаси иш услубини тубдан ўзгартириши, ўсиш нуқталарини аниқ белгилаши зарурлиги таъкидланди. Шунингдек, мураббийлар ва раҳбарларнинг ойлик маоши спортчилар эришаётган натижаларга боғланиши лозимлиги қайд этилди.

 

Мутасаддиларга юқори натижаларга эришган спорт мактабларини амалдаги рағбатлантириш тизимидан ташқари қўшимча равишда 500 миллион сўмдан алоҳида мукофотлаш тизимини жорий этиш топширилди.

 

Йиғилишда спорт федерациялари фаолияти ҳам танқид қилинди. Хусусан, федерациялар томонидан ҳамкорлар топиш, молиявий манбаларни кенгайтириш ва тадбиркорларни спортга жалб этиш борасида ташаббуслар етишмаётгани қайд этилди.

 

Таъкидланишича, мамлакатда спортга қизиқадиган ва ҳомийлик қилишга тайёр тадбиркорлар сони ортиб бормоқда. Бироқ ҳозиргача бирорта федерация тадбиркорлар билан ўзаро манфаатли ҳамкорлик бўйича аниқ таклифлар киритмаган.

 

Шу муносабат билан мутасаддиларга 26 та спорт федерациясидаги бош котиблар ва бошқарув кадрлари фаолиятини чуқур ўрганиб чиқиш, лавозимига лойиқ бўлмаган раҳбарларни алмаштириш бўйича тегишли чоралар кўриш топширилди.