Ўзбекистондаги айрим ОТМларда талабаларнинг 70 фоизи жисмоний норматив топшира олмаган
Шавкат Мирзиёев ректорларга спорт бўйича бир йиллик аниқ режа ишлаб чиқишни топширди.
Президент Шавкат Мирзиёев раислигидаги видеоселектор йиғилишида олий таълим муассасаларида спорт йўналишидаги ишлар етарли даражада эмаслиги танқид қилинди.
Маълум қилинишича, олийгоҳларда спорт федерациялари билан ҳамкорлик суст бўлиб, иқтидорли талабалар билан индивидуал ишлаш тизими ҳам етарли даражада йўлга қўйилмаган.
Шу билан бирга, айрим олий таълим муассасаларида ижобий тажрибалар ҳам мавжуд. Хусусан, Термиз давлат университетида 4 та спорт клуби ташкил этилиб, 5 минг талаба 18 та спорт турига жалб қилинган. Талабалар ўтган йили халқаро мусобақаларда 18 та медални қўлга киритган. Университетнинг волейбол ва гандбол жамоалари олий лигада, футзал ва футбол жамоалари эса биринчи лигада иштирок этмоқда.
Бироқ айрим олийгоҳларда аҳвол қониқарсизлигича қолмоқда. Жумладан, Жиззах политехника институти, Тошкент тиббиёт университетининг Термиз филиали, Қарши давлат техника университети ҳамда Бухоро давлат университетида талабаларининг қарийб 70 фоизи жисмоний нормативларни бажара олмаган. Бу эса мазкур олийгоҳларда спорт клублари фаолияти самарасиз эканини кўрсатади.
Шу муносабат 207 та олийгоҳ ректорларига Термиз давлат университетининг тажрибасини ўргатиш ва спорт бўйича бир йиллик режа ишлаб чиқиш топширилди.
