ЖССТ Ғазодан тиббий эвакуацияларни тўхтатди
Бунга ташкилот ходимларидан бирининг ўлими сабаб бўлган.
Жаҳон соғлиқни сақлаш ташкилоти (ЖССТ) Ғазо секторидан беморларни тиббий эвакуация қилиш жараёнини вақтинча тўхтатди. Бу қарор ташкилот билан ҳамкорлик қилган пудратчи ходимлардан бирининг хавфсизлик ҳодисаси оқибатида ҳалок бўлиши билан боғлиқ. Бу ҳақда ТАСС хабар берди.
ЖССТ бош директори ўз баёнотида маълум қилишича, ҳодиса Ғазо секторида содир бўлган. Унга кўра, ташкилот билан ишлаган хизмат кўрсатувчи пудратчи ҳалок бўлган.
“ЖССТ афсуски, бугун Ғазо секторида содир бўлган хавфсизлик ҳодисасида хизмат кўрсатувчи пудратчимиз ҳалок бўлганини тасдиқлайди. Ушбу ҳодисадан сўнг бугунги кунда беморларни Ғазодан Рафаҳ орқали Мисрга тиббий эвакуация қилиш жараёни тўхтатилди”, — дейилади баёнотда.
Маълум қилинишича, ҳодиса вақтида ЖССТнинг яна икки ходими воқеа жойида бўлган, бироқ улар жароҳат олмаган.
Ташкилотга кўра, Ғазо секторидан беморларни Рафаҳ чегара пункти орқали Мисрга тиббий эвакуация қилиш ишлари кейинги хабарнома берилгунга қадар тўхтатиб турилади.
Ҳодиса юзасидан тегишли органлар томонидан текширув ўтказилиши кутилмоқда.
