Афғонистонда сув тошқинлари ва кўчкилар қурбонлари сони 130 дан ошди
12 кун давом этган ёмон об-ҳаво Афғонистонда минглаб уйларнинг вайрон бўлишига сабаб бўлди.
Афғонистонда кучли ёмғирлар оқибатида юзага келган сув тошқинлари ва кўчкилар натижасида ҳалок бўлганлар сони 130 нафардан ошди. Бу ҳақда Синхуа ахборот агентлиги хабар берди.
Агентликнинг Миллий табиий офатларни бошқариш бошқармаси маълумотларига таяниб билдиришича, табиий офатлар оқибатида 132 киши ҳалок бўлган, яна 192 киши жароҳат олган.
Маълум қилинишича, мамлакат ҳудудида 12 кун давом этган кучли ёғингарчилик кўплаб ҳудудларда сув тошқинлари ва ер кўчишларига сабаб бўлган. Натижада 5400 га яқин бино тўлиқ ёки қисман вайрон бўлган.
Табиий офат оқибатида кўплаб чорва моллари ҳам нобуд бўлгани қайд этилмоқда. Энг кўп зарар кўрган ҳудудларга қутқарув ҳамда гуманитар ёрдам гуруҳлари юборилган бўлиб, ҳозирда етказилган зарарни аниқлаш ва жабрланганларга ёрдам кўрсатиш ишлари давом этмоқда.
