АҚШ ва Эрон сулҳга эришганидан сўнг ҳам ҳужумлар давом этмоқда

Форс кўрфази минтақасида Эрон ва АҚШ ўртасида икки ҳафталик сулҳ эълон қилинганига қарамай, бир қатор давлатлар ўз ҳудудларида ракета ва дрон ҳужумлари кузатилганини маълум қилди, дея хабар бермоқда Al Jazeera.

 

БАА Мудофаа вазирлигига кўра, мамлакат ҳаво мудофаа тизимлари Эрон томонидан учирилган баллистик ва қанотли ракеталар ҳамда дронларни тўсиб қолган. Мамлакатнинг турли ҳудудларида эшитилган портлаш овозлари айнан ушбу тўсиб қолиш жараёнлари билан боғлиқ экани қайд этилган.

 

Кувайт армияси ҳам эрталабдан бошлаб жами 28 та дрон йўқ қилинганини билдирди. Маълум қилинишича, айрим дронлар муҳим нефть объектлари, электр станциялари ва сувни туздан тозалаш иншоотларини нишонга олган. 

 

Баҳрайн Ички ишлар вазирлиги эса Ситра ҳудудида дрон тўсиб қолинганда парчалар тушиши оқибатида икки нафар фуқаро енгил жароҳат олганини маълум қилди. 

 

Шунингдек, бир нечта уйларга зарар етган. Пойтахт Манамада портлаш овозлари эшитилгани, Ситра оролида эса тутун кўтарилган.

 

Айни пайтда, Эрон ҳозирча ушбу даъволарга расмий муносабат билдирмаган. Бироқ мамлакат давлат телеканали Лаван оролидаги нефтни қайта ишлаш заводи ҳам ҳужумга учраганини маълум қилди. Ёнғинни ўчириш ишлари олиб борилаётгани, жабрланганлар йўқлиги айтилмоқда.

 

Вашингтон ва Теҳрон ўртасидаги сулҳ АҚШ президенти Доналд Трамп томонидан Эронга берилган муддат тугашидан бир соат олдин эълон қилинган эди.