Билл Гейтс АҚШ Конгрессида Эпштейн билан алоқалари бўйича кўрсатма беради
Microsoft асосчиси россиялик аёллар билан ишқий муносабатда бўлганини тан олиб, Эпштейн билан алоқалари учн ходимларидан узр сўраган эди.
Microsoft асосчиси ва хайрия ишлари билан танилган Билл Гейтс жорий йил 10 июнь куни АҚШ Конгресси комиссиясига кўрсатма беради. Ушбу комиссия жинсий жиноятчи Жеффри Эпштейн фаолиятини текширмоқда.
Қайд этилишича, Конгресс аъзолари 3 март куни Гейтсдан Эпштейн билан дўстона муносабатлари ҳақида маълумот беришни талаб қилганини тасдиқлади. Аввалроқ комиссия олдида бошқа машҳур шахслар, жумладан АҚШнинг собиқ президенти Билл Клинтон ва унинг рафиқаси, собиқ давлат котиби Ҳиллари Клинтон ҳам кўрсатма берган.
Гейтснинг расмий вакили BBC'га маълум қилишича, у “қўмита аъзоларининг барча саволларига мамнуният билан жавоб бериб, уларнинг ишига кўмаклашади”.
Маълумотларга кўра, Эпштейн жиноятларидан жабр кўрганлар ҳеч қачон Гейтсга нисбатан айблов қўймаган. Унинг исми АҚШ Адлия вазирлиги томонидан эълон қилинган “Эпштейн файллари”даги миллионлаб ҳужжатларда кўп бор учрайди, бироқ бу ҳолатнинг ўзи ноқонуний ёки номақбул хатти-ҳаракатларга далил бўла олмайди.
Адлия вазирлиги Эпштейн иши бўйича қарийб уч миллион ҳужжатни эълон қилган, яна бир неча миллион ҳужжат эса ҳали очиқланмаган.
Шунингдек, сўнгги йилларда хайрия фаолияти билан шуғулланиб келаётган Гейтс Эпштейн билан бир муддат дўстона алоқада бўлганини яширмайди. Бироқ у унинг жиноятлари ҳақида ҳеч нарса билмаганини таъкидлаб келади.
“Gates” жамғармаси маълумотига кўра, Гейтс яқинда ушбу масала юзасидан ташкилот ходимлари билан учрашув ўтказиб, ўз ҳаракатлари учун жавобгарликни зиммасига олган.
The Wall Street Journal маълумотларига кўра, Гейтс ходимларидан узр сўраган, шунингдек Россиядан бўлган икки аёл билан муносабатлари бўлганини тан олган ва бундан Эпштейн хабардор бўлган. Нашр ёзишича, Эпштейн ушбу муносабатлардан бирига доир маълумотлар билан Гейтсга таҳдид қилишга уринган.
The Wall Street Journal Гейтс ходимларига молиячи Эпштейн билан 2011 йилда, яъни молиячи вояга етмаган шахсни фоҳишаликка жалб қилишда айбини тан олганидан бир неча йил ўтиб, танишганини айтган. У Эпстейнга нисбатан қўйилган сафар чекловлари ҳақида билганини, бироқ унинг таржимаи ҳолини етарлича текширмаганини ҳам қўшимча қилган.
Аввалроқ Гейтс Австралиянинг 9News телеканалига берган интервьюсида Эпштейн билан алоқалари фақат умумий кечки овқатлар билан чекланганини айтган ва унга тегишли оролга ҳеч қачон бормаганини таъкидлаган.
“Мен у билан ўтказган ҳар бир дақиқадан афсусдаман ва бунинг учун узр сўрайман”, — деган Гейтс.
Лекин BBC'га берилган баёнотда унинг вакили Гейтс ҳеч қачон Эпштейн билан умумий зиёфатларда қатнашмаганини ва унинг ноқонуний ҳаракатларига алоқадор бўлмаганини билдирган.
Яқин ойларда Эпштейн билан алоқалар бўйича АҚШ Конгресси комиссиясига АҚШнинг амалдаги савдо вазири Ҳовард Лютник ва собиқ бош прокурор Пем Бонди ҳам кўрсатма бериши кутилмоқда.
