Дунёга ўт қўйиб, кейин челак билан келганларни олқишламаймиз — Испания Бош вазири
Педро Санчес Яқин Шарқда сулҳ ўрнатилгани ҳақидаги хабарларга муносабат билдирди.
Испания бош вазири Педро Санчес Эрон атрофидаги можарода ўт очишни тўхтатиш ҳақидаги қарорга муносабат билдирди. Шу билан бирга, у АҚШ президенти Доналд Трампга нисбатан танқидий позициясини сақлаб қолди.
Испания ҳукумати раҳбари Х ижтимоий тармоғидаги баёнотида сулҳ эълон қилинишини “яхши янгилик” деб атаб, мазкур қарор адолатли ва барқарор тинчликка олиб келса қўллаб-қувватланишини қайд этди.
Бироқ Санчес вақтинчалик енгиллик юзага келгани можаро оқибатлари — вайронагарчилик, тартибсизлик ва бой берилган инсонлар ҳаётига кўз юмишга асос бўла олмаслигини таъкидлади.
“Испания ҳукумати дунёни ёқиб юбориб, кейин қўлида челак билан пайдо бўлганларни олқишламайди”, — дея ёзди у.
Санчес аввал ҳам мазкур ҳужумларни ноқонуний деб баҳолаб келган. Унга кўра, ҳозирги вазиятда асосий эътибор дипломатия, халқаро ҳуқуқ ва тинчликни таъминлашга қаратилиши лозим.
