Қозоғистондан Ўзбекистонга автомобилда қатнов вақти қисқариши мумкин
Қозоғистоннинг Туркистон вилоятида Сариағашни айланиб ўтувчи йўл қурилмоқда.
Қозоғистоннинг Туркистон вилоятида Сариағашни айланиб ўтувчи йўл қурилиши шаҳар юкламасини камайтириб, Ўзбекистонга транзитни тезлаштириши кутилмоқда. Бу ҳақда Қозоғистон Вазирлар маҳкамаси хабар берди.
Маълум қилинишича, мазкур айланма йўл транзит транспортни шаҳар ташқарисига чиқариш, шаҳар йўл тармоғига тушадиган юкламани камайтириш ва Ўзбекистон йўналишида ҳаракатни сезиларли даражада тезлаштириш имконини беради.
Лойиҳа 102,6 километр узунликдаги, тўрт полосали ҳаракатга эга I-а техник тоифадаги замонавий автомобиль йўлини қуришни назарда тутади. Йўл замонавий халқаро стандартларга мос бўлиб, транспорт воситаларининг узлуксиз ва хавфсиз ҳаракатланиши учун шароит яратади.
Хабарга кўра, жорий йилда “Шимкент – Қизилўрда” автомобиль йўлида умумий узунлиги 103 км бўлган яна 5 та ўрта таъмирлаш лойиҳасини амалга ошириш режалаштирилган.
Ушбу лойиҳаларнинг комплекс амалга оширилиши замонавий ва хавфсиз йўл тармоғини шакллантириб, ҳудудда транспорт хизматлари сифатини яхшилайди ҳамда Қозоғистоннинг Марказий Осиёдаги транзит салоҳиятини кучайтиради.
