Telegram бир кунда 100 мингдан ортиқ канал ва гуруҳни блоклади
2026 йил бошидан буён мессенжер қарийб 12 миллион ҳамжамиятни ёпган.
Telegram мессенжери бир кун ичида 100 мингдан ортиқ канал ва гуруҳни блоклади. Бу ҳақда мессенжернинг расмий статистик маълумотларида қайд этилган.
Маълумотларга кўра, 7 апрель куни платформада 100 700 дан ортиқ канал ва гуруҳ фаолияти тўхтатилган. Аввалроқ ҳам бундай кўрсаткич 100 мингдан ошгани қайд этилган бўлиб, бундай ҳолат сўнгги бор 17 март куни кузатилган.
Статистикага кўра, 2026 йил бошидан буён Telegram жамоаси деярли 12 миллион канал ва гуруҳни блоклаган. Уларнинг катта қисми платформа қоидаларини бузганлиги сабабли ёпилган.
Хусусан, 154 798 та канал ва гуруҳ жинсий мазмундаги материалларни тарқатгани учун, 53 939 та ҳамжамият эса зўравонлик ва терроризмни тарғиб қилгани сабабли блокланган.
Шунингдек, йил бошида платформада кенг кўламли модерация ишлари олиб борилган. Январ ойида кунига 300 мингдан ортиқ, февраль ойида эса 230 мингдан ортиқ канал ва гуруҳ блокланган.
Таъкидланишича, 2025 йилда Telegram жамоаси 44 миллиондан ортиқ ҳамжамиятни блоклаган бўлиб, бу кўрсаткич 2024 йилга нисбатан қарийб 2,7 баравар кўп экани қайд этилган.
