Тошкент вилоятида сунъий интеллект маркази ташкил этилиб, туманлар салоҳияти таҳлил қилинади
Президент йиғилишида Тошкент вилояти камбағаллик ва ишсизликдан холи ҳудудга айлантирилиши топширилди.
8 апрель куни Президент Шавкат Мирзиёев Тошкент вилоятида амалга оширилаётган ислоҳотлар натижадорлиги ва келгусидаги устувор вазифаларни муҳокама қилиш бўйича кенгайтирилган йиғилиш ўтказди. Давлат раҳбари вилоят аҳолисининг турмуш даражаси пойтахт даражасида бўлиши лозимлигини таъкидлаб, бу мақсадга эришиш учун тадбиркорлик, саноат, хизмат кўрсатиш ва қишлоқ хўжалиги соҳаларида намуна бўлиш зарурлигини қайд этди.
Йиғилиш давомида сўнгги йилларда вилоятда амалга оширилган кенг қамровли ислоҳотлар натижалари таҳлил қилинди. Хусусан, 2024-2025 йилларда 14 та янги саноат зонаси ташкил этилди, 115 та инвестиция лойиҳаси амалга оширилди ва 237 та янги экспортчи пайдо бўлди. Натижада 300 мингдан ортиқ янги иш ўрни яратилди.
Паркент, Оҳангарон ва Олмалиқ туманларида электротехника, металлургия, фармацевтика, тўқимачилик, машинасозлик ва тоғ-кон соҳаларидаги йирик лойиҳалар ишга туширилди. Пойтахт экологиясига салбий таъсир кўрсатган 87 та корхона Тошкент вилоятига кўчирилмоқда.
Вилоят иқтисодиёти 2025 йилда:
- ялпи ҳудудий маҳсулот 7,1 фоиз
- саноат маҳсулотлари 6,6 фоиз
- қишлоқ хўжалиги 4,2 фоиз
- хизмат кўрсатиш 15,2 фоиз
- қурилиш 9,8 фоизга ошди.
2026 йилда эса вилоят иқтисодиёти 9,1 фоиз, саноат 8,8 фоиз, хизматлар 17,2 фоиз, қурилиш 15 фоиз, қишлоқ хўжалиги 6,6 фоиз ўсиши, 6,2 млрд доллар инвестиция жалб қилиш ва 2,8 млрд доллар экспортни таъминлаш режалаштирилган.
Йиғилишда шунингдек, рақамли технологиялар ва сунъий интеллект ёрдамида туманлар салоҳияти таҳлил қилиниши, “Рақамли тараққиёт – сунъий интеллект маркази” ташкил этилиши таклифи қўллаб-қувватланди. Саноатни бошқариш тизими модернизация қилиниб, инвестиция ва экспортни ошириш ҳамда тайёр ва ярим тайёр маҳсулот улушини кўпайтириш бўйича аниқ кўрсаткичлар белгиланди.
Жорий йилда 883 та маҳаллани камбағаллик ва ишсизликдан холи ҳудудга айлантириш, 84,7 минг аҳолини доимий ишга жойлаштириш, 37 минг норасмий иш ўрнини легаллаштириш ва 13,3 минг ишсиз фуқарони касбга ўқитиш вазифаси қўйилди.
Қишлоқ хўжалиги ва озиқ-овқат хавфсизлиги масалалари ҳам алоҳида муҳокама қилинди. Чорва ва парранда етиштириш ҳажми пойтахт ва вилоят эҳтиёжларини қамраб олиш учун етарли эмаслиги қайд этилди. Шу боис, Оҳангарон туманида чорвачилик ва озуқа базасини кенгайтириш, Қўйчилик ва эчкичилик илмий-ишлаб чиқариш маркази ташкил этиш режалаштирилган. 2026 йилда вилоятда 2,1 триллион сўмлик 78 та чорвачилик лойиҳаси амалга оширилиши ва 496 та янги иш ўрни яратилиши кўзда тутилган.
Паррандачилик ривожи, сув тежовчи технологиялар жорий этиш, янги ерларни ўзлаштириш, боғ ва узумзорлар барпо этиш, пиёз ва саримсоқ етиштириш каби лойиҳалар ҳам белгиланди. Шунингдек, туризм соҳасида Бўстонлиқдаги «Амирсой» ва “Белдерсой ресорт” каби лойиҳаларни бошқа тоғли ҳудудларда ҳам амалга ошириш режалаштирилмоқда. Вилоятда туризм экспортини 600 млн долларга, сайёҳлар сонини 16,5 млн га етказиш вазифаси қўйилди.
Йиғилишда ижтимоий лойиҳалар: уй-жой, ичимлик суви, электр тармоқлари, трансформаторлар янгиланиши, маҳаллаларда йўллар ва коммунал инфратузилмани яхшилаш масалалари муҳокама қилинди. Шунингдек, Юқори Чирчиқ туманида 400 гектар майдонда “Tashkent Medical Smart City”, Нурафшон шаҳрида Келажак технологиялари маркази каби инновацион лойиҳалар ҳам кўриб чиқилди.
Йиғилиш якунида Президент Шавкат Мирзиёев мутасаддиларга Тошкент вилоятидаги мавжуд салоҳиятдан тўлиқ фойдаланиб, янги иш ўринлари яратиш, аҳоли даромадларини ошириш ва яшаш шароитини яхшилаш юзасидан аниқ топшириқлар берди. Тошкент вилояти камбағаллик ва ишсизликдан холи ҳудудга айлантирилиб, бошқа ҳудудлар учун намуна бўлиши вазифаси энг устувор вазифа сифатида белгиланди.
