Трамп Эронга қурол етказиб берувчиларга 50 фоизлик бож билан таҳдид қилди
Маълумотларга кўра, Эрон ва Хитой ўртасида овоздан тез учувчи ракеталар бўйича эҳтимолий келишув муҳокама қилинган.
Доналд Трамп Эронга қурол етказиб берадиган мамлакатларга нисбатан қатъий иқтисодий чоралар қўлланиши мумкинлиги ҳақида огоҳлантирди.
АҚШ президенти бу ҳақда Truth Social ижтимоий тармоғидаги саҳифасида маълум қилиб, Теҳронга ҳарбий қурол етказиб берадиган давлатлар АҚШга экспорт қиладиган барча маҳсулотларига 50 фоизлик бож жорий этилиши мумкинлигини таъкидлади.
“Эронга ҳарбий қурол етказиб берадиган ҳар қандай мамлакат бугундан бошлаб Қўшма Штатларга сотиладиган барча товарларга дарҳол 50 фоизлик бож тўлайди. Ҳеч қандай истисно бўлмайди”, — деб ёзган Трамп.
Шу билан бирга, у АҚШ ва Эрон ўртасида тарифлар ҳамда санкцияларни юмшатиш масаласи муҳокама қилинаётганини ҳам қайд этган. Унинг сўзларига кўра, эҳтимолий тинчлик келишуви бўйича 15 банддан кўпроғи аллақачон келишиб олинган.
Трамп, шунингдек, Эрон “жуда самарали режим ўзгаришини бошдан кечирганини” таъкидлаб, мамлакат эндиликда уранни бойитиш фаолиятини тўхтатганини билдирган. Унинг айтишича, АҚШ Эрон ҳудудида жойлашган барча чуқур кўмилган ядровий объектларни аниқлаб, уларни йўқ қилиш чораларини кўради.
Аввалроқ Реутерс агентлиги Эрон ва Хитой ўртасида қурол-яроғ бўйича эҳтимолий келишув мавжудлиги ҳақида хабар берган эди. Маълумотларга кўра, келишув доирасида Хитойнинг SM-302 туридаги овоздан тез учувчи ракеталарини Теҳронга етказиб бериш масаласи муҳокама қилинган. Ушбу ракеталар денгиздаги ҳаво мудофааси тизимларини четлаб ўтиш имкониятига эга бўлиб, минтақадаги Америка ҳарбий кемалари учун хавф туғдириши мумкин.
