Яқин Шарқ “олтин давр”га кириши мумкин — Трамп
АҚШ президенти Эрон билан икки ҳафталик сулҳни “дунё тинчлиги учун муҳим кун” деб баҳолади.
Доналд Трамп Яқин Шарқ минтақаси Эрон билан эришилган сулҳ фонида янги босқич — “олтин давр”га кириши мумкинлигини таъкидлади.
АҚШ президенти бу фикрни Truth Social ижтимоий тармоғидаги саҳифасида билдириб, Эрон билан икки ҳафталик сулҳ бўйича келишувни “дунё тинчлиги учун муҳим кун” деб атаган.
Унинг таъкидлашича, АҚШ ва Эрон ўртасида эришилган вақтинчалик сулҳ ҳамда можарони дипломатик йўл билан ҳал қилиш бўйича режалаштирилаётган музокаралар Яқин Шарқда барқарорликни мустаҳкамлаши мумкин.
Трамп, шунингдек, Ҳормуз бўғози очилиши минтақада иқтисодий фаолликни ошириб, савдо ва энергетика соҳасида ижобий ўзгаришларга замин яратишини таъкидлаган.
“Бу дунё тинчлиги учун ажойиб кун. Эрон ҳам тинчликни хоҳлайди. Кўплаб ижобий ҳаракатлар бўлади. Бу Яқин Шарқ учун олтин давр бўлиши мумкин”, — деб ёзган АҚШ президенти.
Эслатиб ўтамиз, 7 апрель куни АҚШ ва Эрон ўртасида икки ҳафталик сулҳ бўйича келишувга эришилгани эълон қилинган эди. Ушбу қарор томонлар ўртасидаги кескинликни камайтириш ҳамда дипломатик музокаралар учун имкон яратиш мақсадида қабул қилинган.
