Исроилнинг Ливанга қилган ҳужумида Белгия ташқи ишлар вазирининг ўлишига бир бахя қолди
У ҳужумлар пайтида Ливан президенти билан учрашувда бўлган.
Белгия ташқи ишлар вазири Максим Превост 8 апрель куни Ливанга расмий ташрифи чоғида Исроил ҳужумининг қурбонига айланишига сал қолганини айтди.
Превостнинг сўзларига кўра, Исроил мудофаа кучлари вазир Ливан президенти Жозеф Аун билан учрашаётган пайтда олдиндан огоҳлантирмасдан Байрутга катта зарба берди. Музокаралар ракета ҳужуми содир бўлган жойдан бир неча юз метр нарида жойлашган элчихонада бўлиб ўтган.
“АҚШ, Исроил ва Эрон ўртасидаги сулҳ Ливанни ҳам қамраб олиши керак”,— деб таъкидлади Белгия ташқи ишлар вазири.
Превост Ливан ҳукуматини қўллаб-қувватлаш ва Исроил ва “Ҳизбуллоҳ” ўртасидаги можародан жабр кўрган оилалар билан бирдамликни билдириш учун Байрутга келди.
8 апрель куни АҚШ ва Эрон икки ҳафталик сулҳга келишиб олдилар. Бироқ, кўп ўтмай, Исроил “Ҳизбуллоҳ” инфратузилмасига энг катта ҳужумни эълон қилди.
Исроил армиясининг маълумотларига кўра, зарбалар Байрут, Бека водийси ва жанубий Ливанга қаратилган. Исроил Мудофаа Кучлари жами 100 дан ортиқ нишонга, жумладан, қўмондонлик пунктлари ва ҳарбий иншоотларга зарба берганини даъво қилмоқда.
Ливан фуқаролик мудофааси маълумотларига кўра, чоршанба куни содир бўлган кенг кўламли бомбардимон 254 кишининг ҳаётига зомин бўлди (рақамлар аниқланмоқда) ва мингдан ортиқ одам яраланди.
Эрон парламенти раиси Муҳаммад Багир Қолибафнинг айтишича, Ливанга берилган зарбалар икки томон ўртасидаги музокараларга путур етказади.
