Эронда Али Хоманаий хотирасига бағишланган мотам тадбирлари ўтказилмоқда
Тадбирлар 10 апрелга қадар давом этади.
Эронда олий раҳнамо Али Хоманаий вафотининг 40-куни муносабати билан кенг кўламли хотира тадбирлари ўтказилмоқда. Умумхалқ мотам маросимлари Ислом тарғиботини мувофиқлаштириш кенгаши томонидан ташкил этилган бўлиб, тадбирлар 10 апрелга қадар давом этиши режалаштирилган.
Хотира тадбирларининг энг муҳим қисми 9 апрел куни бўлиб ўтди. Теҳрон шаҳрида эрталаб соат 9:00 да — Эрон раҳбари 28 феврал куни ҳалок бўлган вақтга тўғри келадиган пайтда — Жомҳури-йе Исломий майдонидан оммавий мотам юриши бошланди. Ушбу юришда минглаб фуқаролар, диний арбоблар ва жамоатчилик вакиллари иштирок этган.
Шу куни кечқурун мамлакатнинг муқаддас масканларида марҳум оятуллоҳ хотирасига бағишланган жамоавий ибодатлар ўтказилган. Маросимлар давомида унинг архивдаги нутқлари ва аудиоязувлари янграган.
Мотам тадбирларида Қуръон тиловатлари, шунингдек “қаршилик фронтининг ғалабаси” учун дуолар ҳам ўқилган. Ушбу маросимлар минтақада давом этаётган кескин ҳарбий вазият фонида ўтказилмоқда.
28 феврал воқеаларидан сўнг минтақада кескинлик кучайиб, Эрон, АҚШ ва Исроил ўртасида бир қатор ўзаро ҳарбий зарбалар амалга оширилгани қайд этилмоқда.
