Навоийда болаларга зўравонлик қилинган хусусий боғча вақтинча ёпилди
Мазкур боғчадаги тарбиячи болаларга бақирган, уларни силтаб тортиб, урган ва тепган.
Навоий шаҳридаги хусусий боғчада болаларга қўпол муомала қилиб, уларни урган тарбиячи ишдан олиниб, муассаса вақтинча ёпилди. Бу ҳақда Бу ҳақда вилоят Мактабгача ва мактаб таълими бошқармаси хабар берди.
Ижтимоий тармоқларда тарқалган видеоларда тарбиячи болаларга бақиргани, силтаб тортиб, ургани ва тепгани акс этган.
Вилоят Мактабгача ва мактаб таълими бошқармаси хабарига кўра, ҳодиса бошқарма ҳузурида тузилган ишчи гуруҳ томонидан атрофлича ўрганилди.
Текширув натижасида педагогик этика ва касбий меъёрларга зид ҳаракат қилган тарбиячи билан тузилган меҳнат шартномаси амалдаги қонунчилик асосида бекор қилинди.
Шунингдек, таълим муассасасининг фаолияти қонунда белгиланган тартибда вақтинча тўхтатилди.
Ҳолат юзасидан тегишли тартибда қўшимча ўрганиш ишлари бошланди.
