Нетаняху Ливан билан тинчлик музокараларини бошлашни буюрди
Музокаралар Ҳизбуллоҳни қуролсизлантириш ва тинчлик ўрнатишга қаратилган.
Исроил Бош вазири Бенямин Нетаняху Ливан билан тўғридан-тўғри тинчлик музокараларини имкон қадар тезроқ бошлаш бўйича кўрсатма берди. Бу ҳақда унинг идораси баёнотида маълум қилинган.
Қайд этилишича, мазкур қарор Ливан томонидан бир неча бор илгари сурилган музокаралар ўтказиш таклифларига жавобан қабул қилинган.
“Ливан томонидан Исроил билан тўғридан-тўғри музокараларни бошлаш бўйича такрорий чақириқларни инобатга олиб, мен уларни имкон қадар тезроқ бошлашни буюрдим”, — дейилади баёнотда.
Исроил томонининг таъкидлашича, музокараларнинг асосий мақсади Ҳизбуллоҳ гуруҳини қуролсизлантириш ҳамда Исроил ва Ливан ўртасида барқарор тинчлик муносабатларини йўлга қўйишдан иборат.
Аввалроқ, Ливан президенти халқаро воситачилар иштирокида Исроил билан тўғридан-тўғри музокаралар ўтказиш ташаббуси билан чиққан эди. У минтақадаги вазиятни дипломатик йўл билан ҳал қилиш зарурлигини таъкидлаган.
Ҳозирда томонлар ўртасида эҳтимолий музокараларнинг формати ва кун тартибини белгилаш бўйича тайёргарлик ишлари олиб борилиши кутилмоқда.
