Омбудсман маҳкумларни қийноққа солган ИИО ходимларига жиноий иш қўзғатилганини маълум қилди
13 нафар ходимга нисбатан интизомий жазо қўлланилган, 2 нафари хизматдан бўшатилган, 1 нафари эса огоҳлантирилган.
Феруза Эшматова Сенат мажлисида 2025 йилда маҳкумларга нисбатан қийноқлар қўллангани юзасидан 4 нафар ички ишлар органи ходимига нисбатан жиноий иш қўзғатилганини маълум қилди.
Олий Мажлиснинг Инсон ҳуқуқлари бўйича вакилнинг сўзларига кўра, маҳкумларга руҳий ва жисмоний босим ўтказилгани ҳақидаги мурожаатлар ўрганилиб, 39 та ҳолат бўйича ички ишлар ходимларига нисбатан хизмат текширувлари тайинланган.
Натижада 13 нафар ходимга нисбатан интизомий жазо қўлланилган, 2 нафари хизматдан бўшатилган, 1 нафари эса огоҳлантирилган.
Шунингдек, 12 та мурожаат бўйича жиноий иш қўзғатишни рад этиш ҳақидаги қарорлар бекор қилиниб, қўшимча текширувлар тайинланган.
Омбудсман маълумотига кўра, 2025 йилда инсон ҳуқуқларини бузган жами 118 нафар давлат ва ҳуқуқни муҳофаза қилувчи орган ходими интизомий, маъмурий ва жиноий жавобгарликка тортилган.
Йил давомида қийноқларнинг олдини олиш мақсадида 954 та мониторинг ташрифи амалга оширилган. Ушбу жараёнда 11 мингдан ортиқ маҳкум билан жамоавий, қарийб 5,5 минг нафари билан эса индивидуал суҳбатлар ўтказилган.
Бундан ташқари, санитария талабларига жавоб бермагани сабаб Чиноз, Қибрай ва Юқори Чирчиқ туманларидаги вақтинча сақлаш ҳибсхоналарининг фаолияти тугатилган.
