Сурхондарёда қозонлар ичига яширилган 190 кг дан ортиқ гиёҳванд модда аниқланди
750 дона афғон қозонларининг 210 донаси ичига яширин тарзда наркотик жойлаштирилган.
Давлат хавфсизлик хизматининг Сурхондарё вилояти бўйича бошқармаси ходимлари томонидан Чегара қўшинлари ҳамда Божхона қўмитаси билан ҳамкорликда ўтказилган тезкор-қидирув тадбирлари натижасида йирик миқдордаги гиёҳвандлик воситалари контрабандаси фош этилди. Бу ҳақда ДХХ Zamon.uz’га хабар берди.
Маълум қилинишича, Афғонистондан “Термиз” халқаро автомобиль ўтказиш пункти орқали кириб келган, Денов шаҳрида яшовчи 1990 йилда туғилган фуқаро бошқарувидаги Hyundai юк автомашинаси назорат тартибида чуқурлаштирилган текширувдан ўтказилган.
Текширув давомида автомашина юкхонасида бўлган жами 750 дона афғон қозонларининг 210 донаси ичига яширин тарзда жойлаштирилган, умумий оғирлиги тахминан 190 килограмм 800 грамм бўлган гашиш моддаси аниқланиб, мусодара қилинган.
Дастлабки маълумотларга кўра, ушбу афғон қозонлари ишлаб чиқарувчи томонидан Марказий Осиё давлатларидан биридаги хўжалик юритувчи субъект номига жўнатилган бўлган.
Ҳозирда мазкур ҳолат юзасидан тегишли тергов-суриштирув ишлари олиб борилмоқда.
