Ёнилғи шохобчаларида нақдсиз тўловлар улуши маълум қилинди
Бир кунлик нақдсиз тушумларнинг қарийб 90 фоизи банк карталари ҳиссасига тўғри келмоқда. Шунингдек, QR-код ва Moment карталар орқали ҳам тўлов қилинмоқда.
2026 йил 1–2 апрель кунлари ёқилғи қуйиш шохобчаларида нақдсиз ҳисоб-китоблар ҳажми сезиларли даражада ошгани кузатилди. Бу ҳақда Марказий банк хабар берди.
Расмий маълумотларга кўра, март ойида кунлик ўртача тушум 102,6 млрд сўмни ташкил этиб, унинг 58,1 фоизи нақд, 41,9 фоизи эса нақдсиз тўловларга тўғри келган.
1 апрель куни умумий тушум 93,2 млрд сўмни ташкил этган бўлса, 2 апрелга келиб бу кўрсаткич кескин ошиб, 152,6 млрд сўмга етган.
Қайд этилишича, бир кунлик нақдсиз тушумларнинг қарийб 90 фоизи банк карталари ҳиссасига тўғри келмоқда. ҚР-код орқали амалга оширилаётган тўловлар ҳам асосан банк карталари орқали бажарилаётгани аҳоли орасида рақамли тўлов воситаларидан фаол фойдаланилаётганини кўрсатади.
Нақдсиз тўлов усуллари кесимида QR-код орқали тўловлар 1 апрель куни 8,2 млрд сўмни, 2 апрель куни эса 7,7 млрд сўмни ташкил этди. Мoment карталар орқали амалга оширилган тўловлар 1,6 млрд сўмдан 3,6 млрд сўмга ошиб, кескин ўсиш қайд этилди. Ёқилғи карталари орқали тўловлар мос равишда 2,4 млрд ва 2,5 млрд сўмни ташкил этди.
Шу билан бирга, мавжуд банк карталари орқали амалга оширилган тўловлар 1 апрель куни 80,9 млрд сўм бўлган бўлса, 2 апрель куни 138,6 млрд сўмга етган.
Мутасаддилар таъкидлашича, банклар ва тўлов ташкилотлари томонидан жорий этилаётган кешбек дастурлари, акциялар ҳамда янги тўлов воситалари — жумладан, момент ва махсус карталар — нақдсиз тўловлар ҳажмининг ошишига хизмат қилмоқда.
Фуқароларга тўловлар ёки банк хизматларига оид саволлар юзага келганда, тегишли банклар ва тўлов ташкилотларининг алоқа марказларига мурожаат қилиш тавсия этилган.
