Ўзбекистонда бир қатор бозорларнинг айрим блоклари вақтинча ёпилди

Тошкент, Самарқанд, Урганч шаҳарларидаги бозорларда ёнғин хавфсизлиги талаблари бузилгани аниқланди. Бу ҳақда ФВВ хабар берди.

 

Маълум қилинишича, 8 апрель куни Тошкент шаҳар Фавқулодда вазиятлар бош бошқармаси ходимлари томонидан пойтахтдаги бир нечта бозорларда ёнғин хавфсизлиги талабларига риоя этилиши юзасидан рейд текширувлари ўтказилди.

 

Текширувлар давомида Яшнобод туманидаги "Авиасозлар" деҳқон бозори, Шайхонтоҳур деҳқон бозори ҳамда Чилонзор буюм бозорининг айрим ҳудудларида ёнғин хавфсизлиги қоидалари қўпол равишда бузилгани аниқланди. Шу сабабли, камчиликлар бартараф этилгунга қадар мазкур бозорлардаги айрим блоклар фаолияти вақтинча тўхтатилди.

 

Шу билан бирга, Хоразм вилояти Фавқулодда вазиятлар бошқармаси томонидан Урганч буюм бозорида ўтказилган текширувларда ҳам қатор жиддий қоидабузарликлар аниқланган. Мутасаддиларга кўра, ушбу камчиликлар ўз вақтида аниқланмаганида йирик ёнғин ва оғир оқибатларга олиб келиши мумкин эди. Натижада, бозор вақтинча ёпилган. 

 

Бундан ташқари, Самарқанд вилояти Фавқулодда вазиятлар бошқармаси томонидан Самарқанд шаҳридаги "Қурилиш материаллари" савдо мажмуаси фаолияти ҳам ёнғин хавфсизлиги талабларига риоя этилмагани сабаб вақтинча тўхтатилган.

 

Аввалроқ Тошкент шаҳридаги “Бешқўрғон” бозоридаги йирик ёнғин хавфсизлик қоидаларига риоя қилинмагани сабаб юзага келгани ҳақида маълум қилинганди.