Ўзбекистонда болалар саратонига қарши кураш учун янги тизим йўлга қўйилди

Ўзбекистонда болалар ўртасида учраётган онкологик ва онкогематологик касалликларга қарши курашни кучайтириш бўйича кенг кўламли ислоҳотлар амалга оширилмоқда. Президентнинг 2025 йил 19 майдаги ПҚ-186-сон қарорига мувофиқ, 2025–2030 йилларга мўлжалланган миллий стратегия доирасида касалликларни эрта аниқлаш, ташхис қўйиш муддатларини қисқартириш ҳамда даволаш самарадорлигини ошириш асосий вазифалар этиб белгиланган.

 

Мазкур ҳужжат болалар онкологияси, гематологияси ва иммунологияси соҳасини янги босқичга олиб чиқиш, ихтисослаштирилган тиббий ёрдам қамровини кенгайтириш ва замонавий диагностика ҳамда даволаш усулларини жорий этишга қаратилган.

 

Ҳозирда Болалар онкологияси, гематологияси ва иммунологияси илмий-амалий тиббиёт марказида замонавий технологиялар асосида даволаш йўлга қўйилган. Марказ фаолиятига хорижий юқори малакали мутахассислар жалб этилиб, халқаро стандартлар асосида тиббий хизмат кўрсатиш йўлга қўйилган. Ҳар бир бемор болага индивидуал ёндашув таъминланмоқда.

 

Ҳозирда марказ дори воситалари билан давлат бюджети, Жаҳон соғлиқни сақлаш ташкилоти (ЖССТ) ҳамда Цент-Жуд касалхонаси томонидан амалга оширилаётган “Болалар саратонини даволаш учун Глобал платформа” лойиҳаси орқали таъминланмоқда. Ушбу дорилар Ўзбекистон фуқаролиги бўлган барча болаларга бепул берилмоқда.

 

Шунингдек, илгари беморлар марказга келиб олган дори воситаларини эндиликда вилоятлардаги филиаллар орқали етказиб бериш тизими жорий этилди. Махсус транспорт орқали амалга оширилаётган бу жараёнда дори воситаларининг сифати ва сақлаш шароитларига қатъий риоя қилинмоқда.

 

Мутахассислар фикрича, амалга оширилаётган ушбу чора-тадбирлар болалар ўртасида яшовчанлик кўрсаткичларини ошириш, касалликларни эрта аниқлаш ва ўлим ҳолатларини камайтиришга хизмат қилади.