Президент Шавкат Мирзиёев Бухородаги аэропорт лойиҳаси билан танишди
Янги аэропорт ва унга туташ инфратузилма учун шаҳар ташқарисидан 370 гектар ер майдони ажратилган.
Президент Шавкат Мирзиёев Бухоро вилоятига ташрифи доирасида ҳудудда амалга оширилаётган йирик бунёдкорлик лойиҳалари, хусусан, янги халқаро аэропорт қурилиши билан танишди.
Мамлакатимизда транспорт инфратузилмасини модернизация қилиш ва кенгайтириш ишлари изчил давом этмоқда. Янги автомобиль йўллари, кўприклар барпо этилмоқда, йўловчилар учун қулайликлар оширилмоқда. Шу жараёнда Бухоро вилоятининг туризм салоҳиятини янада юксалтириш мақсадида янги халқаро аэропорт қурилиши муҳим аҳамият касб этади.
Мазкур лойиҳа давлат раҳбарининг 2024 йилдаги ташрифи чоғида берилган топшириқлар асосида амалга оширилмоқда. Янги аэропорт ва унга туташ инфратузилма учун шаҳар ташқарисидан 370 гектар ер майдони ажратилган.
Лойиҳа доирасида аэропортга олиб борувчи замонавий автомобиль йўли қурилмоқда. Унинг умумий узунлиги 23,8 километрни ташкил этади. Шундан 2,7 километри янги йўл сифатида барпо этилса, 21,1 километри реконструкция қилинади.
Шунингдек, йўл бўйида 2 та йўл ўтказгич, 9 та ерости пиёдалар ўтиш жойи ва 8 та кўприк қурилиши режалаштирилган.
Янги аэропортда узунлиги 3,3 километр бўлган учиш-қўниш йўлаги барпо этилиб, у барча турдаги ҳаво кемаларини қабул қилиш имконини беради. Шунингдек, соатига 1200 нафаргача йўловчига хизмат кўрсатиш қувватига эга замонавий аэровокзал мажмуаси қурилади.
Давлат раҳбари лойиҳа жаҳон стандартларига тўлиқ мос бўлиши зарурлигини таъкидлади. Ушбу аэропорт Бухоро вилояти аҳолиси, шунингдек, маҳаллий ва хорижий сайёҳлар учун юқори даражада қулай хизмат кўрсатишга хизмат қилади.
Тақдимот давомида ҳудуднинг иқтисодий, инвестициявий ва туризм салоҳиятини оширишга қаратилган бошқа истиқболли лойиҳалар ҳақида ҳам ахборот берилди.
