Путин ёки Трамп туфайли энергия нархининг доимий равишда ошишидан тўйдим — Кир Стармер
Яқин Шарқдаги уруш сабаб Буюк Британия ҳукумати энергия тўловларини назорат қилишга мажбур бўлмоқда.
Буюк Британия бош вазири Кир Стармер энергия нархларининг тез-тез ўзгариши ортида глобал сиёсий омиллар турганини таъкидлаб, вазиятдан норозилигини билдирди.
У 9 апрель куни ITV News телеканалига берган интервьюсида мамлакат бўйлаб аҳолининг ҳамда бизнес вакилларининг энергия учун тўловлари доимий равишда ўзгариб бораётганини кескин танқид қилди.
“Мен бутун мамлакат бўйлаб оилалар ва корхоналарнинг энергия ҳисоблари доимий равишда ўзгариб тураётганини кўриб, бундан тўйиб кетдим. Бу ҳолат дунёнинг турли нуқталарида Владимир Путин ёки Доналд Трамп томонидан қабул қилинаётган қарорлар билан боғлиқ”, — деди Стармер.
Интервьюдан кўп ўтмай, The Guardian нашрида чоп этилган мақолада бош вазир ҳукумат энергия нархларининг кескин ошиб кетишини жиловлаш чораларини кўраётганини қайд этди. Унинг сўзларига кўра, Яқин Шарқдаги можаро фонида электр энергияси нархларини чеклаш ва миллий энергетика тизимига инвестицияларни ошириш орқали ташқи омилларга қарамликни камайтириш мақсад қилинган.
Маълумот учун, Россиянинг 2022 йил февраль ойида Украинага бостириб кириши ортидан энергия ресурслари нархлари кескин ошган эди. Шунингдек, 28 февраль куни бошланган АҚШ ва Исроилнинг Эрон билан боғлиқ ҳарбий ҳаракатлари ҳам глобал энергия бозорига босим ўтказди.
Бироқ 8 апрелга ўтар кечаси АҚШ ва Эрон ўртасида икки ҳафталик ўт очишни тўхтатиш бўйича келишувга эришилгач, хомашё нархларида кескин пасайиш кузатилди.
