Тошкент вилоятида 1 млрд сўмлик сифатсиз дорилар савдоси тўхтатилди
Фуқаро яшаш хонадонида ноқонуний дори омбори ташкил қилгани аниқланди.
Тошкент вилоятида ноқонуний дори воситалари сақланган яширин омбор аниқланди. Бу ҳақда ДХХ хабар берди.
Маълум қилинишича, ДХХ ва Божхона идоралари ҳамкорлигида ўтказилган тезкор тадбирда Тошкент вилоятининг Тошкент туманида истиқомат қилувчи, 1991 й.т. шахс ўз яшаш хонадонида хориждан айланма йўллар орқали олиб келинган дори воситаларини сақлаб, пойтахтдаги дорихоналарга сотиш билан шуғулланиб келганлиги аниқланган.
Омборда жами 119 турдаги, 3356 қутида бўлган 76318 дона “Фроту”, “Буденофалк”, “Гависcон”, “Бараcлуде” ва бошқа номдаги дори воситалари аниқланиб, процессуал тартибда расмийлаштириб олинган. Уларнинг дастлабки умумий қиймати тахминан 1 млрд сўмни ташкил этади.
Ҳозирда дори воситаларидан намуналар олиниб, экспертиза ўтказиш учун Фармацевтика маҳсулотлари хавфсизлиги марказига юборилди.
Ҳолат юзасидан терговга қадар текширув ҳаракатлари давом этмоқда.
