Трамп Эронни Ҳормуз бўғозида тўлов ундиришдан воз кечишга чақирди
Унинг фикрича Теҳроннинг Ҳормуз бўғозидаги ҳаракатлари келишувларга зид ҳисобланади.
АҚШ президенти Доналд Трамп Эронни Ҳормуз бўғози орқали ҳаракатланаётган кемалардан тўлов ундириш режасидан воз кечишга чақирди.
АҚШ раҳбари ушбу баёнотни Truth Social ижтимоий тармоғидаги саҳифасида эълон қилган. Унинг таъкидлашича, Теҳрон томонидан бўғоз орқали ўтаётган танкерлар учун тўлов жорий этилгани ҳақидаги хабарлар жиддий хавотир уйғотмоқда.
“Эрон буни қилмаслиги керак. Агар бундай амалиёт аллақачон йўлга қўйилган бўлса, у дарҳол тўхтатилиши лозим”, — дея ёзган Трамп.
Шунингдек, АҚШ президенти баёнотида Эроннинг Ҳормуз бўғозидаги ҳаракатлари мавжуд келишувларга зид эканини қайд этган. Унинг фикрича, мазкур стратегик ҳудуд орқали нефть ташиш жараёнидаги чекловлар ёки қўшимча тўловлар халқаро мажбуриятларга мос келмайди.
